عام جديد

زى اللى غرقان ولقى طوق نجاة

مسك فية بكل قوتة

سعيد وفرحان لكنة

مش بيضحك.. مستنى لما يوصل لبر الأمان

علشان يحس بجد ان بدأ يعيش

سعيد جدا بطوق نجاتى

عام جديد سعيد على الكل

على الهامش : بنتمنى العرب يلاقوا طوق نجاتهم

ياترى هاييجى صلاح الدين لمرة تانية ؟ ولا صعب

هل ممكن يكون موجود ؟ يمكن يكون المستقبل

إبنى أو إبنك

جايز كل شىء جايز

واللى مش جايز اننا نفضل غرقانين فى بحر من الخوف اللى إحنا حفرناة بإيدينا

بحر الحياة مليان بغرقى الحياة

صرخت خش الموج فى حلقى ملاة

قارب نجاة صرخت

قالوا مفيـــش

غير بس هو الحب قارب نجاة

دا عمنا صلاح جاهين

لو حبينا بعض كعرب اعتقد مجرد إعتقاد هنلاقى بر للأمان

قبـــلك إنتى

قبلك إنتى
كنت شارد فى الحوارى والشوارع والموالد
كنت مجذوب وبهوى الصعاب
وكنت بغوى المتاعب
كنت بعشق إللى يألم واللى يظلم واللى غالب
كنت بتلذذ بحبى لإنسانه تعشق إمتلاك كل الكواكب
عشقها كان صوت مطالب
وكنت مفروض إنى ألبى
وكأنى مجنون ولا شارب
سكران لشوشتة فى الخداع وفى الهوى
وفاكرة كان لية الدوى
لكنة كان أصل المتاعب
جيتى إنتى نور وطهر
جيتى لى بحب حر
معاكى دوقت طعم الحنان
وعرفت معنى عنى غايب
قبلك إنتى كنت غايب مربوط بخيط لكنه سايب
لكن معاكى عمرى ما اكون
غير قلب واعى لكنه دايب
بوعدك انا ليكى وحدك
وهاتكونى لى كل الحبايب

بوعدك

شىء غريب

شىء غريب

شىء ملح جوة قلبى بيقولى ازعق فى السكوت

شىء ملح جوة صوتى بيقول ابكى بأعلى صوت

شىء غريب جوايا صاح .. شىء غريب مش نور صباح

شىء غريب جوايا ثار بيقولى ارفض الجراح

جوايا شىء مش عارفة لسة ... شىء عجيب بيقولى إقسى

شىء غريب بيقولى إرفض ... تبقى تابع فوق وإنسى

شىء بيترجانى ارفض ... بيقولى ازحف قوم واركض

شىء بيطلب منى اعافر ... بيقول ربى ليك ضوافر

قوم وانهش حب والطش اضحك واقفش دادى وانكش

شىء بيطلب منى اطبطب ابقى قاسى وابقى طيب

بيقولى دوس اضرب وطيب بعدها هاتكون كبير

مش ناوى احب مش ناوى اغير ... مش ناوى اكون من غير مصير

مش ناوى اكون تابع واكون انسان حنون حب بجنون

والحب لية بيكون نهايتة يكون معاة نهاية المصير

مش ناوى اكون انسان مالوش نفسى اكون وسط الوحوش

كبير وهاكبر وسطهم وبكرة اكون من قبلهم

وبكرة هاتلذذ بكونى اقوى واحد منهم

بكرة هاتلذذ بكونى حد ينهش لحمهم

زى زمان ما أذونى اة ..وكنت بضحك للحياة

كنت بضحك على خيبتى يمكن او بموت منها الحياة

بكرة اكتب بدمايا اسرار مشاعرى وأكون معايا

يا اما هاخسر نفسى يمكن ...وبرضوا مش فارقة معايا .

حرية الإختيار

تتملكنى أفياض من الأفكار



وأنهار من رؤى بالليل وبالنهار



شذرات من الماضى



تعصفنى كالإعصار



حنين لأيام مضت تغمرنى



تأخذنى بعيدا عن سماء الأرض



وتلقينى فى عمق البحار



وأغرق فى ماض حزين



وأسبح فى مدار



أطوف حول ذكرى تحرقنى بنار الشوق



كالفراشة تحن لنور ساطع



لكنه فى الحق نار



لكنها لا تتوب وتدور حولة



بتصميم وإستمرار



ولا تزال تسبح وسط اللهيب



لا تعرف معنى اليأس أو الإنهيار



لكنها بشوقها الجماح الفياض



لا تتألم من النار إنما

من ذكريات كأنها تسبح ضد التيار



فلا رجوع ولا أعذار



ليس سوى الوصول الوصول



لحـــرية الإختــيــار



فيض من الأنوار والراحة والإنتصار

علـــشان خــاطر عيـــونك

علشان خاطر عيونك

أتحمل ساعات جنونك

وأغرق تانى فى ظنونك

سلمتى خلاص ... بخونك !!!

بصيت جوة فى عيونك

مش قادر حتى ألومك

دا أنا عمرى فى يوم ما اخونك

علشان خاطر عيونك

طول عمرى بتمناكى

وقلبى يحلم ليلاتى

بتمنى أكون معاكى

ازاى اقدر أخونك

وبرغم غرقك فى ظنك

وبرغم حزنك وصمتك

دايما بعشق جنونك

سلمتى خلاص .. بخونك

انا والله عمرى ما أقدر

أبعد أو حتى افكر

غير فيكى وانا مش بلومك

علشان خاطر عيونك

لــــســـت أدرى

لست أدرى

لست أدرى لماذا يتملكنى الوجوم

ولا اعبأ لشىء .. وكأن بداخلى سماء .. كلها غيوم

لا أرى بداخلها ... اية أقمار أو نجوم

لم يعد يجذبنى فرح أو حزن أو هموم

لم تعد تتملكنى الحيرة !!!

ولا الرغبة فى مجالسه فتاة على شاطىء البحيرة

أو التودد إلى شقراء او إرتشاف قبلات أخاذة أثيرة

لم اعد أظما للوجود ... لم أعد أعبأ بالنهود

ولا اخذ الوعد والوعود والتوعد والجحود

ولا اريد حتى العبث مع فراشة صغيرة

لا اريد الرفقة والرفاق ولا الصحبة والفراق

وما اريدة حقا لست ادرى لست ادرى ماهو

هل هو الموت البطىء ... ام استرجاع نور لم يضىء

حياة لم أعشها .. ذكريات من خيال

صار درب من محال

لست ادرى هل عشقت كل وهم او خيال ؟


اين الخطأ ؟ أفى التمنى والمنى !!!

ام فى حلم قد مضى ولم يزال ؟

لست أدرى ...

مصر يـــاما بخرينا... بس إوعى تحرقينا

مصر ياما بخرينا ... بس اوعى تحرقينا

امى زمان لما كنت اتحسد كانت ترقينى وتبخرنى ولحد دلوقتى والله اة وربنا بترقينى وتاخدنى بحنيتها على
رجلها برغم انى اصبحت كما الشحط والشحط هو تقريبا الدكر الجاموسى لما يكون على وش جواز
وارتباطا بأن مصر أمنا واحنا شكلنا محسودين كلنا فحاولت تاخدنا على رجلها وتبخرنا لكن بدون قصد ولعت
فينا .
شوية فحم من المبخرة الكبيرة بتاعة أمنا طاروا فوقعوا حبة على مجلس الشعب ولعوا فية شىء وارد
وشوية فحم تانيين وقعوا على مرسح الازبكية ( قل مرسح وليس مسرح ) بالمرة بقى احسن امنا تزعل تانى
وشوية كدة بالصلاة عالنبى على مصنع شيبسى والمحلة و6 أكتوبر والعاشر
و داخل الإدارة المركزية للمطافى شخصيا اة وربنا المية كانت مقطوعة يوميها عندهم او تقريبا عتريس كان
قافل الهاويس بتاع المية بتاع ارض المطافى علشان محدش يروى الارض وطبعا فؤادة لحقت والحمد لله تفتح
الهاويس وكانت ليلة سوخة يا ولاد .
واخيرا وليس بأخر حريق مستشفى المطرية حسب ماجاء الخبر فى الصحف شب حريق هائل بمستشفى المطرية التعليمى، فى تمام الساعة التاسعة والربع مساء أمس الثلاثاء، أخرجت على إثرها إدارة المستشفى والعاملون، المرضى من غرف الرعاية المركزة إلى الشارع خوفاً على حياتهم.وبدأ الحريق فى الدور الثانى بقسم المخ والأعصاب، وحضرت سيارات المطافئ إلى مكان الحادث بعد ساعة، فى حين حضر أهالى المرضى ليأخذوا ذويهم إلى مستشفيات أخرى لإنقاذهم.يذكر أن مستشفى المطرية شهدت كارثة إهمال كبرى، تسببت فى مقتل أربعة أطفال داخل الحضانات، بعد
انقطاع الكهرباء وتعطل المولدات الكهربائية الاحتياطية.
والحادثة دى تحديدا انا لامسها وعايشها كويس اوى حيث أن مستشفى المطرية التعليمى ، فيها كمية تسيب لاحصر لها لايمكن إحصاؤها ولى من الحوادث ملا يعد ولا يحصى بطبيعة الحال حيث اننى أسكن بجوار تلك المقبرة او المستشفى كما يزعمون ولكننى اطلق عليها المقبرة الجماعية لان من داخلها مفقود والخارج منها مسعود ( ودا مبيحصلش كتير )
موقع المستشفى الجغرافى فى وسط احد الاحياء الاكثر شعبية والاكثر إزدحاما فى القاهرة وهى منطقة المطرية
مطلة على عدد غفير من المقاهى البلدية ، انتظر ليحل الليل لترى اطباء الامتياز يخرجون فى مجموعات
ليجلسوا على احد المقاهى الموجودة لييدخنوا الشيشة ويلعبوا الطاولة ويأكلوا ويهيصوا لاء وخارجين بإية بقى
بالزى الرسمى للمستشفى وسعات بلبس العمليات الاخضر والشبشب البلاستيك اة والله شبشب بلاستيك ومرة
شوفت دكتور منهم خارج وحاطط سماعتة على كتفة وبياكل كبدة وسجق على القهوة ، يا عم كل كبدة براحتك
بس ماتسيبش العيانين يولولوا وانت بتضرب شندوتشات برة وبتشيش راعيهم برضوا يا دكترة
وحصلت أول حادثة وهى وفاة الاطفال فى الحضانات لما النور قطع و المولدات ما اشتغلتش وطبعا دى مش
اول حادثة دى اول حادثة تتنشر وطبعا الدكاترة مش موجودة ولا المدير واللى موجود على القهوة واللى مقضيها
وتولع الناس بجاز وفعلا وحدث اخيرا ان احترقت المستشفى وخرج المرضى ليهربوا بجلدهم قبل
مايتحرقوا فى نار الدنيا مفضلين نار الاخرة على نار الدنيا ، تقريبا المستشفى بتتبع اسلوب ( وجع ساعة ولا
كل ساعة ) موفرين الام المرضى فى الدنيا فوجدوا ان العلاج فى حرقهم احياء .
طيب ازاى مستشفى زى دى بتخدم قطاع كبير من المواطنين تكون كدة فى قمة الاستهتار دكاترة امتياز
وصغيرين وقلنا ماشى اهو يتعلموا أى نعم بيتعلموا فى الناس لكن بنقول يلا دكتور فى اليد خير من ألف فى
مستشفى خاص بينهبوا فى الفلوس لكن لا دكاترة ولا امان ولا نضافة ؟؟؟؟ تبقى إية دى بقى مش مستشفى تبقى
تلاجة للموتى انا واحد من الناس لو بموت مش هاروحها دا انا مرة جالى مغص كلوى بالليل رفضت اروحها
وفضلت انى اتحمل الالم لحد الصبح لحد ما اروح اى مستشفى تانية احسن ما اروح هناك
والله الموفق وكفاية كدة واوعدكوا بجد لو شفت اى دكتور تانى على القهوة لاحدفة بموقد الفحم بتاع الشيشة
علشان يجرب نار الناس .
ملحوظة : لكل مستهتر يتلاعب بأرواح الناس إن الله يمهل ولا يهمل

وإنتى زعلانة

بحبك وإنتى زعلانة

بحبك نسمة هيمانة

بحبك لون فى رسماية

بحبك ما انتى غنواية

بغنيها وبسمعها

بتسعد شوقى وهوايا

******
بحبك طير بجناح لولى

بيلمع شوقة فى عيونى

أبوس قلبك ماتزعل يوم

دا بيك أيامى صالحونى

أبوس الحب فى عيونك

ألف الدنيا وما أخونك

دا بيك الدنيا عرفتنى

أموت لو يوم تقسى على

وعينك لايمة لعيونى

قلـــم جـــا ف

قلم جـــاف

جف القلم من كثرة الأوهـــام

جف القلم من بعد حب قد ذهب

من بعد قلب لم ينــام

من بعد قلب قد نضب

لم يبقى معنىً للكلام

لم يبقى معنىً للصراخ وللألام

فالوهم قد زال ... لكنه

خلف جراحا لا تنـــام

فالوهم .. مخلوق أصم

لا يرتوى الا بـــدم

أراقة عذب الكـــلام

جف القلم .. ونعيتة

بللتة .. لكنه قد مـــات

جف القلم لم يبق منه

سوى الفتــات

لم يبق منه

سوى ذكريات

جف القلــــم

كـــل سنـــة وانتم طيبــــين

كل عـــام ونحن إلى الله أقرب

محمد ودينا

أنا و نَفٌسى ... همسة عتاب

عنبر العقلاء رقم 1 : قسم الخطرين جدااااااا


نَفٌسى: أخدت حقك من كل اللى ظلمك ومش بإيدك د ا بانتقام إلهى

على مستوى العمل ، وعلى مستوى الحياة الاجتماعية ، والعاطفية

اومال اية ؟ عاوز إية تانى ؟

انت على فكرة مش بتسامح !!

ودا غلط جدا إنت زى الجمل تنضرب وتخزن !!!

انت حابب انك تتشٌفى وتتمتع بإنكسار اللى قدامك ؟؟

أنا : اة وجدا وجدا وجدا كمان

نَفٌسى: انت هاتمرضنى لية انا مش عاوزة أصاحب إنسان معتوة او حد مريض

انا : اة انا مريض نفسى ، لأن نفسى مش راضية عنى وانا مش راضى عن نفسى

نَفٌسى: يعنى إنت مش طايقنى لإنى نفسك ؟؟؟

انا : انا فعلا مش طايقك يا نفسى عارفة لية ؟

نفسى : لية يا أنا !!!!

أنا : علشان انتى كنتى فين يا نفسى من زمان لما اخترت غلط لما وقعت ، كنتى فين .. ولا كنتى معايا

دلوقتى زعلانة منى !!

انا برضوا وبعصبية : كنتى فين لما ناس كتير وقفت ضدى ، كنتى فين لما إتألمت وبكيت ، ماسمعتش منك

صوت اوحتى همس فى ودانى يصبرنى ، ينصحنى ، يقوينى ، اقوم ألاقى اللى يقف معايا مش هو نفسى ، من

برة نفسى ، لو نفسى ماتنصحنيش يبقى انا عليها ما ابقيش ، علشان كدة كارهك

زى ماكرهت كل اللى وقفوا ضدى علشان كدة يا تتغيرى يا هاعيشك فى جحيم بلاش ضميرك يعمل على

راجل دلوقتى ، هاعيشك فى مرض ، السكوت اللى سكتية زمان هاحولوا لتفكير باستمرار هاخليكى فى ألم ليل

ونهار

علشان كدة ما اسمعش كلمة منك عن إنى بتشفى أو فرحان

اة فرحان لكنى ما ظلمتش بالعكس انا المظلوم

ولوا المظلوم الايام دى بقى مريض نفسى يبقى انا مجنون وهاشتغل فى الجنان الهندى اللى مفيش منة علاج

واللى بيخلى صاحبة يتعامل معاملة اطفال ودا أحلى شىء فى الدنيا .

اخد حقى واضرب واهين واشتم وفى الاخر اعمل اهبل ومجنون

لو جنانى هايجيبلى حقى يبقى يا أهلا بالهبل والجنان ، هاصلبط ايــــون هاصلـــبط

نَفٌسى: حتى على يا أنا ؟

انا : حتى على اى حد يا نَفٌسى ..

انا بقيت إنسان جديد

انا موش عارفنى

انا توهت منى انا موش أنا

زمان لما كنت بخاف على أحاسيس الناس اللى قدامى ومابحرجهمش كنت باخد بالجزمة القديمة ايوة جزمة قديمة وريحتها مقرفة

دلوقتى انا بقى مش بهاجم لله فى لله لوحدى ، انا بدافع بس خير الدفاع الهجوم بهاجم وباكل وبفترس وبخربش

وباكل اى حد ، ولما عملت كدة بقيت باشا وبية وأفندم وبحلم يتقالى يا معالى الـــ كمان علشان إية بقيت بتعامل نفس المعاملة

مع اى حد ، المؤدب انا اكتر منة ادب ، الاصفراوى انا كركم اكتر منه ، والعصبى بقلم واحد بقوة وعيونك

محمرة هايخااااااف جدااااااااا جنس البنى ادم نمرود مايختشيش

زمان محمد على باشا الكبير قالها المصرى دا معروف ديتة ، شعب يجمعة ناى ويفرقوا كربـــــاج .

صح يا باشا انت قديم برضوا وخبرة .

ومن بعدك فهمنا الدرس كويس اوى وطبقناة ونفذناة واللى من بعدك جة ونفذ كلامك بالحرررررررف

واحنا نفذنا كأننا مسحورين ، يجمعنا ناى وطبلة ورقصة وضحكة او حتة لحمة ، ويفرقنا كرباج سودانى

سيبك من دا كلة انا فرحان أوى علشان شايف حد ظلمنى اوى اوى اوى جة اليوم اللى بيتوجع زيى ومن

نفس الكاس اللى شربتة ، كنت ابكى واملى الكاس ومن دموعى أشرب لا كاس ولا إتنين بل ثلاث وأربع وعشرون كأسا أى نعم !!!!

اللهم لاشماتة ، إحنا بس بنقول اللهم لك ألف حمد وشكر .

يارب ماتحكمنى على حد ، زى ما حكمت فى ناس زبالة انا مش عاوز ابقى زيهم

ويارب يارب ماتشمتنيش فى حد ، يارب قوينى على القوى ورقق قلبى مع الضعيف .

حسبى الله لا إله الا أنــــت عليك توكلـــت وأنت رب العرش العظيـــــم .


تحذير : إذا تطابق فكر اى حد مع فكرى وشاف نفسة انه من الناس اللى ظلمتنى يبقى هو على راسة بطحة

ولو حد فاكر انى بكتب كدة علية يبقى برضوا على راسة بطحة

مش اتفقنا انى مجنون ولا حرج على المجانين

على الهامش :-

لية لية موش شايف لية

ليـــة ليــة موش شايف لية وانا عينى مفتوحة

وازاى أغنى وانا روحى مدبوحة

وازاى ولية ناكل فى بعضينا

وإحنا براح الكون يقضينا

هو أحنا لية قاسيين على روحنا

وبقينا لية نضحك على جروحنا

طب لية وفين تاهت ملامحنا

غابت سنين ونسينا مين إحنا

هو احنا مين و إزاى ولية

تبقى القلوب جاحدة

والكون يا ناس أرض وسما وإحنا

إمتى القلوب تصفى وتتهنى

والغيم يدوب تبقى الحياة جنة

إمتى براح الكون يقضيـــنا !!!!!

سمعتها من غناء روبى وألحان ياسر عبد الرحمن فى شكل أوبرالى تحفة بتعبر عن الحالة اللى بعيشها

كان معكم رئيس عنبر العقلاء قسم الخطرين اوى اوى

محمد أبو فوزى .

نسيـــم الصـــباح

نسيم الصباح


أتنفس فى الصباح

عشقاً وعقلاً وطيبة

أتنفس إرتياحا واشتياقا لدنيا جديدة

كانت بعيدة .. وصارت اليوم قريبة

أتنفس أشواقا ورائحة عطر فريدة

رائحة عطر العفة والبكورة

فى زمن العفة باتت فية محض ذكرى مقتولة

ومدنسة ببقايا الرجولة

أو كفريسة .. ذنبها بعض من الإنوثة

فى ظل سيطرة القوة والفحولة

أتنفسك عطرا أخاذا لم يدركة غيرى

ولم تفتح ايقونة أريجةَ لسواى

اتنفسك فى يوم صيف نارى

كرزاز أمطارا ً يدغدغ كل كيانى

كدواء يريحنى من علة أيامى

أتنفسك صباحا على ظهر مركب

أَبحر بة فى بحر أحلامى

تنسانى الدنيا وتذكرينى

وتأتينى طائرة

كعصفور يغرد فوق أيامى

ويمحو الحزن منها

ويبدلها بنغماتٍ وألحانِ

إهداء إلى ملهمتى

وقــــفـــــة مصرية

وقفة مصرية

فوجىء الجميع بتطبيق الكشف الطبى على راغى الزواج وانه لن يتم عقد القران بدون إظهار نتيجة الكشف

الطبى للزوجين والموثق من إحدى مستشفيات وزارة الصحة

حدث هرج ومرج ولا أنكر ترددى فى كتابة هذا الموضوع أكثر من مرة ومسح كل ما كتبتة كل مرة

نظرا لكونى كنت أتصور أنه يخدش الحياء ولكن .... لم اتمكن من الامساك بتلابيب مشاعرى تجاة رغبتى فى

الكتابة والتنفيس عن رغبتى .. ليست الجنسية بالطبع ولكن رغبتى فى الاشباع .. وليس الجنسى برضوا ولكن

فى التفريج عن ما جال بصدر جموع الشباب وخصوصا وانا احدهم من ذلك القرار الذة قد إستنفر كل مشاعرنا

المعادية لذلك القرار .

اولا : نحن لا ننكر ولا نستهجن الكشف الطبى فى حد ذاتة ولكن ننكر تطبيقة إرغاما لنا كشباب

ثانيا : تطبيقة فى مستشفيات الحكومه مما لا يدع مجالا للشك فى حدوث الهرج والمرج والخناقات والزعيق واللى عرف واللى معرفش مع خفة دم المصريين فى التريقة مع وجود بعض الغمز واللمز عند خروج شخص ولم يستطع ان يقوم بالتحليل هايغنولوا ( الصراحة راحة يا حاحا وانت مابتعرفش ) وغيرها من تعليقاتنا الساخرة وربنا يستر على اعراض رجالنا .

ثالثا : زيادة حجم الاعباء المادية والنفسية وخصوصا النفسية على الشباب ففى هذة الحليلات إمتهان للرجوله بكل معانيها حيث انه يفتح بابا للقيل والقال .... انتى فسختى خطوبتك لية يا حبيبتى ... اصلوا طلع راجل نص كم يا طنط .. طلع غير لائق طبيا وادولوا الشهادة الحمرا زى بتاعة الجيش وأخد إعفاء من الجواز .

وعلى كدة بقى هايدولوا فترة سماح تلات شهور ويرجع يمتحن تانى زى الرخصة بتاعة السواقة ههههههههه

يانهار اسود علينا وعلى ايامنا المقندلة إسترها معانا يا رب .

رابعا : مخالفة لنظرية فحولة الرجل المصرى اللى إحنا ماشيين على حسها من أيام الفراعنة اللى كان

لما واحد منهم يعدى جمب واحدة بس يعدى تخلف توينز دا طبعا هايخلى رؤوسنا قد السمسمه قدام العالم كلة

خامسا : الخوف طبعا هايخلى عنترة بن شداد نفسة يجيلة هبوط حاد فى أعصابة الموصلة لاطرافة الخارجية مما يؤدى الى حدوث حالة من الخـــــمول التام او الموت الزؤام مما سيؤدى لظاهرة

الانتحار والاغتراب

وزيادة الكبت وظهور أمراض نفسية جديدة مثل :

فوبيا تحليل السائل المنوى

ورهاب المعامل

ورهاب الاكواب البلاستيك التى سيتم اخذ العينة بداخلها

وهيستيريا إحتباس القذف

وجنون العظمه الذى سيتمتع به اللى صحتة مساعداة ومتعود على دخول الحمامات العامة من قبل ما يخترعوا التحليل كان بيعمل بروفا .

سادسا : ظهور وسائل مساعدة جديدة كظهور بنات الهوى ولكن بأسلوب جديد حيث صنصحوا فى يوم من الايام لنجد إعلان بأحد المواقع الالكترونية عن .. ( مدرسة بهيج الصابونى للتدريب على كيفية أخذ العينة عن طريق الرياضات الروحية والاسترخاء وإزالة التوتر بمساعدة من أمهر الفتيات الفاتنات اللذيذات .. تكفينا زيارة واحدة ومش هاتقدر تغمض عنيك وهاتفتكرنا وانت بتعمل التحليل )

سابعا : دى بقى حاجة ايجابية .. سترفع الايدى بالتضرع والدعاء وستمتلىء المساجد والزوايا والاضرحة بالرجال والنساء بالدعاء لابنائهم واخوانهم واخواتهم .. اللهم استرنا فوق الارض وتحت الارض ويوم العرض عليك قادر يا كريم ، يارب عبدك فلانى عندة بكرة تحليل زواج ماتكسفوش قدام الناس ولا قدام أهل خطيبتة يا كريم .

ثامنا : ظهور سوق سوداء لبيع عينة تحليل سائل منوى ( الطازج ) ، ( بخيرة ) ، ( الغنى ) ، ( أول قطفة ) .


تاسعا : رواج السياحة ونزول الروسيات بغزارة كوسائل مساعدة وتطبيق التجربة الروسية والتجربة السنغافوريه باعتبارها من اكبر دول العالم اهتماما بمتعة الشباب وراحتهم زورونا ومش هاتنسونا

عاشرا : حبيبتنا الصين طبعا مش هاتسكت وبكرة أفكركوا هى أملنا فى إبتكار جهاز السحب الفورى بدون ألم

لمن يخجل من أخذ العينة بالطرق التقليدية يكفيك تركيب الخرطوم وسيقوم بالشفط الألى للعينة
جهاز الشفط الجبار قوة 1000 واط بسعر رمزى يكفى للأستعمال ل 10 مرات متتالية او متوازية وحسب

سعة تبدأ من 2 ملل إلى 15 جالون .


عذرا للجميع انا حاولت قدر المستطاع إنى ما الخبطش ولا أخبط فى حد بس غصب عنى


انا حابب بس أنبة الى انه محدش يخاف نصيبك هاتاخدوا لانة لو ظهر عند اى حد اى مرض يمنع لاقدر الله من الزواج ان ربك كريم قادر على كل شىء ماهو ناس كتير مش بتخلف ومش بيبقى غير العشرة الطيبة بين الراجل وزوجتة

لا تحاليل ولا اى شىء هايمنع أمرا كان مفعولا ونصيب هاتاخدوا والانسانة اللى بتحبها لو نصيبك هاتاخدها برضوا

احنا بنقول بس ان الموضوع المفروض مش إجبار المفترض يكون فية توعية عن طريق وسائل الاعلام ما احنا بنصرف ملايين على حملة الوقفة المصرية فى الاعلام

بكرة مانلاقيش حاجة لا تقف ولا تقعد بكرة كلة هاينام

بس على مين احنا برضوا المصريين مش فارقة معانا

هانتجوز لو قلعتونا ملط فى الشارع خلاص فاضل إية تانى تعملوة

انا مستعد من دلوقتى دا حتى الجو نااااااااار وسلملى على مولد سيدك العريان .


رحماك يا الله

دور علــية تلقـــاة .. دور علــية دور

دور علية تلقاة .... دور علية دور

إطمنى

كتير بكيت من حزنى قبلك

وكتير شكيت للناس ملام

وسنين داريت حزنى وقلبى

ماعرفش إية معنى الغرام

لكنى فجأة لقيت مشاعرى

مشتاقة ليك شوق وانسجام

لقيتنى بفرح والفرحة دى

خليتنى اقول اجمل كلام

صدقنى انا مخلوق عشان

اتوة وادوب فــ نظرة عنيك

حبى وشوقى بيناديك

وإطمنى الفرحة والله مقربة

انا فرح عمرى ... بين ايديك





يااااااااااااااة بجد مكنتش فاكر انى هاحب وافرح ، بدور على الحب زى

اللى بيدور على حاجة ضايعة منة فى حتة ضلمة من غير نور برغم ان

النور حوالية ومالى الدنيا لكنة مغمض عنية عنة ، والناس كلها تنصح

وتقول دور بص النور حواليك

وانا بدور على الضلمة والخوف والعتمة والدموع والبكا والحاجات دى

وفجأة ، وبدون مقدمات ولا دباجات ولا دموع وبكا ولا اى حاجات مؤلمة

بسهولة زى إحساس الحرير لما يلمس خدك زى لمسة طفل صغير

لايدك ، بكل عفوية وبكل فطرة لقيت اللى بتمناة واكتر بكتير

حد تحس إنة كتير عليك ، كتير فى مشاعرة فى حبة ليك فى حفاظة

عليك وخوفة عليك ورقتة وهو بين إيديك

حد تعرف إن ربنا راضى عنك وبيحبك علشان ارتضاهولك حبيب

فرحان ومش عارف اكتب حاجة كل اللى اقدر اقولوا

لكل واحد مش لاقى الحب دور علية دور يمكن يكون قدام عنيك ومش

شايفة . ماتبحث عنة يبحث عنك هايجيلك وتروحلوا لوحدك طريق

مرسوم وهاتمشية .

خبر هــــــــــــــــــــــــام

خطوبتى على أرق إنسانة شوفتها وعرفتها إنشاء الله يوم الجمعة القادم

25 / 7 / 2008

مبروك يا دينا ياروح قلبى .

وعقبالكوا جميعا ويارب يارب يفرحنا كلنا .
تحياتى للجميع

محمد فوزى

كــــوخ الذكريات

كــوخ الذكريات


تراودنى الأفكار

وذكريات من نار

تتلاطم بى كأمواج على شاطىء

أمام كوخ منهار وبعض من الاحجار

يحوى فى باطنة ذكريات قديمة

كالأحجار الكريمة واللألىء الدفينة

ذكريات عمر وأفراح كالغبار

تهب كالرياح على شاطىء العمر

وفجأة تتبخر وتنهار

كالصنوان فى قوتها

كرائحة الزنابق فى رقتها

وفجأة تعصفها الامواج وتأكلها البحار

وتأتى من بعد ذلك أمواج جديدة

تغسل مابقى منها من أفكار

وتعصف بذكريات أليمة

بعد أن تمزقنى الحيرة وتلعب بى الأقدار

وأجلس وحدى أمام كوخ ذكرياتى المنهار

أسترجع مابقى منى ومابقى من أسرار

وفجأة أبكى أمطارا وأمواجا

ثم ألملم شتات الذكريات

وأغلق باب الأفكار

بَحــس بــــيك

بحس بيك

سيبنا بعض لكنى لسة بحس بيك

سيبنا بعض وشوق عيونى بيناديك

سيبتنى و الشوق مالينى وكمان ماليك

جرحتنى وانا لسة ببكى بشوقى لعنيك

لسة فاكر ضحكتك.. مجلجة تشق السكون

لسة فاكر لمستك وسط العيون

لسة فاكر كل همسة ودمعة تنزل م العيون

سنين كتير وانا مداريكى بشوقى الحنون

وسيبنا بعض ...

لكنى باقى عاللى كان فى يوم مابينا

ولسة مشتاق وقلبى يصرخ فى السكون

وقلبى عذرة من الجنون

انى لسة بحس بيك

اللى عايـــــــشة الدور .... تعـــــنس وتبـــور

اللى عايشة الدور .... تعنس وتبور


زواج زواج زواج زواج جواز جواز جواز جواز جواز كمل نص دينك كمل نص دينك كمل نص دينك إستقرار إستقرار إستقرار حياة جديدة حياة جديدة حياة جديدة سعادة وفرحة وهدوء بال سعادة وفرحة وهدوء بال

كل هذة الكلمات تتلاحق وتدور بداخل عقلى وتفكيرى باستمرار بشكل أشبة بالمرجيحة أو الحلزونة ياما الحلزونه على رأى عادل إمام ، حتى انهار واتمدد على حافة السرير واحاول الارتخاء واحاول ان انام الا ان هذة المرجيحة تلاحقنى وتتشابك امامى صور كل من اعرفهم وكل من له صلة بى وحدثنى فى أمر الزواج وافيق صارخا واقول بسسسسسسسسسسسس خلاص حاضرررررررررر هاتجوز بس اشوف الاول واقرر والاقى بنت الحلال

وأجد كل الشخصيات تجيب بصوت واحد صارخا انا اللى هاجيبلك بنت الحلاااااااااااال !!!!!!!!!

ارد مذعورا اوك خلاص يا جماعة بس انا ظروفى شوية لسة مش متظبطة ...... ويفاجئونى محدشششششششششش بدأ مرة واحدة اخطب وربك هايكرمك ... حاضر حاضر بس سيبونى انا مهيس منكوا ومش شايف

ونبتدى المشوار : اللى مكنتش اصلا ناوى امشية الا مع الانسانة الوحيدة اللى عشقتها ولكنها فى لحظة لم تعد موجودة وربنا يكتبلها الخير بتمنى لها ألف سلامة .

السؤال بيطرح نفسة : بلدنا كبلد ظروفة صعبة وظروف الشباب مطينة بطين وارتفع سن الزواج عند الشباب من الجنسين لحد ما وصل ل 30و 25 ان مكانش اكتر المفروض يحصل إية؟؟؟؟؟؟؟؟

يبقى فية تيسير يبقى فية مراعاة للظروف لا شغل ولا فلوس ولا شقق يبقى الناس تقدر الوضع والظروف

هاتقولوا فية طبعا ناس بتقدر ... اقولكوا دا كلام قعدات فارغة لما الستات تقعد تتكلم مع بعضها فى فرح ولا فى ميتم

ولا فى السوق وكل واحدة تقول بس البنت يجيلها عدلها ، يارب مش طالبين اكتر من واحد عارف ربنا ويراعى ربنا

فى البنت وفى بيتة ويكون راجل وبتاع مسؤلية ومش مشكلة يكون على قدة اهم حاجة يكون كويس ومحترممممم

لحد هنا وزى الفل كلام ناس فاهمة حلو .... ولكن !!!!!!!!!

تروح بقى تتقدم اول مرة تتقابل بترحاب

وكأنك صلاح الدين او أحد الصالحين الاولياء او من الصحابة رضوان الله عليهم

ويحصل القبول من الطرفين وكلام حلو يتقال ليك الله الله

انت شاب كويس فى زمن ضاعت فية الاخلاق فى زمن الشباب مالهمش فى المسؤلية

احنا زارنا النبى انهاردة احنا واحنا واحنا ومقدمات معروفة ومدروسة

والحياة بقى لونها بمبى وفجأة .......


نظرية المؤامرة :

انت وقعت ولا الهوى اللى رماك هع هع هع دى ضحكة مخيفة

تدخل بقى فى المعمعة

س: شغال فين؟

ج : شغال فى شركة .................. والحمد لله شركة كويسة

س : متأمن عليك إجتماعيا وصحيا ؟

ج : الحمد لله وفى احسن مستشفيات

س : طبيعة شغلك إية ؟

ج : والله كذا وكذا وكذا

س : بتقبض كام ؟ ومعلش فى السؤال وماتزعلش !!

ج : الحمد لله بقبض ................. جنية

طيب كويس والله اهى بداية ... على الرغم ان الحمد لله مرتب كويس بس ربنا يبارك

س : الشقة بقى فيييييييييين ومساحتها قد إية والدور الكام ؟

ج : والله مساحتها صغيرة بس دى مرحلة وانا مش ناوى تكون دى شقة العمر

اما عن مكانها فهى فى مكان شعبى ولكنة حيوى جدا

س : نشوفها امتى ؟

ج : اى وقت تشرفوا

ونروح ونشوف .............. وتتم الموافقة المبدئية الحمد لله

وبـــــعدها يتغير الكلام

س: ينفع تغير الشقة ؟ لانها صغيرة والبيت مش حلو والمدخل مش مريح والشارع مش ولابد والناس شكلها وحش فى الشارع ومن الاخر مش لازمانا .......

ج : مش انتوا كنتوا وافقتوا مبدئيا وتانى شىء مش اتفقنا انها مرحلة ومحدش بيطلع السلم مرة واحدة وانها مش شقة العمر مش دا كان كلامكوا

س : قدامك مهلة اسبوع تدور اوكى ؟

ج : نعم !!! اسبوع عموما الله المستعان ولكن ممكن أسال انا بقى سؤال
س : انتوا مش عايشين فى البلد دى ؟

ج : عايشين يابنى وعارفين ظروف الشباب

س : انتوا عارفين انى لسة ببدأ حياتى ؟

ج : اة يا حبيبى وربنا يعينك

س : انتوا ناويين تجوزاوا بنتكوا ؟

ج : اومال بنلعب

س : انتوا موافقين على كشخص ؟

ج : طبعا انت حد كويس ومحترم وعارف ربنا ومن جائكم من ترتضون دينة فزوجوة

س : طيب لية كدة بقى ؟

ج : يابنى الشقق على قفا مين يشيل وهتلاقى

- ارد حاضر حاضر حاضر هاشوف وفى سر ى بقول ( حسبنا الله ونعم الوكيل )

- باحتصار بعد رحلة عناء اخرى انتهى الا انى لو تخلصت من شقتى وقمت ببيعها لن اتمكن من استئجار عشة فراخ ايجار جديد ولو بعد حين ، فى ظل ارتفاع اسعار العقارات والحديد والاسمنت

- ومع ذلك تكون الاجابة منهم ( كل شىء قسمة ونصيب الشقة مش هانقول انها مش من مستوى بنتنا ولكنها مش من مستواك انت شخصيا )

- عموما انا عارف مستوايا كويس اوى والحمد لله

انا عبد الله الفقير إلى الله والغنى بالله والمستعين بالله

وبقول لكل شاب وكل فتاء ان الجواز لا يفيد ولو اتجوزت ومراتك ضربتك على قفاك اديلها قفاك الاحتياطى علشان ترتاح

قرار : مش هما عايشين الدور ودى مش تجربتى لوحدى دى مجموعة تجارب لى انا واصحابى

قررنا الاتى مقاطعة الزواج وان كان ولابد يبقى هانتجوز من برة مصر خالص

وزى ما كتبت قبل كدة فى يوست سابق ( عروسة صينى تسعدلى سنينى ) انظر البوست وقول رأيك http://ensangded.blogspot.com/2008/02/blog-post.html

هو دا الحل ( علشان اللى عايش فى الدور يعنس ويبور ) وبوست أخر هو بوست ( مشكلة العنوسة

فى مصر المحروسة (http://ensangded.blogspot.com/2007/04/blog-post_18.html

ومابتقفش على حد وربنا يهدى الجميع

حقيقة : الحرام مفيش اسهل منة اما الحلال صعب صعب اليومين دول

اللهم إغننا بحلالك عن حرامك

تحياتى للجميع من مهرجا ن

( الجواز مش للجميع ) .

الجواز بيعة وشروة اوعى تندب على سهوة .

خـــايـــف أوى

خايف اوى

خايف يموت حلمى الصغير بيك

خايف اتوة والقى السكات مالى عنيك

خايف اضمك والمسك تجرحنى فيك

مها اوصف بالكلام حلمى يصرخ بالألام

ومهما تجرحنى أعيش من غير ملام

ومهما تبعد عنى يوم

فى هواك حبيبى بصحى وبنام

وخايف اوى

قربلى يوم وبعدها امشى وغيب

لحظة لقا هى المنى وهى النصيب

لحظة لقاك دنيا هاعيشها لو يوم تغيب

وخايف أوى

محمد فوزى

كنـــــت خـــلاص

كنت خلاص

كنت خلاص قربت افرح

وحلمت كتير فى الشوق بسرح

لكنى صحيت من احلامى

على جرح جديد من اوهامى

مانا كنت خلاص قربت افرح

من تانى يادنيا معاندانى !!

احلام اشواق موش سمعانى

ولا الدنيا خلاص نسيانى

قررت أكون إنسان تانى

لكن عمرى ماهاكون جانى

لو حتى زمانى بكانى

ما انا كنت خلاص قربت افرح

محمد فوزى

ماريـــــونت

ماريونت

ماريونت صحيت.. وفوقت .. وغيبت

ماريونت صاحبت حته بت

امريكية بس هى شقرا والله

وبيها توهت .. ماريونت

ماريونت حبال طويلة شدتنى ليها

وفيها دوبت .. ماريونت

ماريونت لقيتها ناصبة لى فخ

وجاية هى وناس معاها

بالسموم ونازله بخ

وماريونت

وماريونت البت طلعت واحدة ست

ماهى ماريونت

لقيتنى انا مربوط فى ساقية

ودايرة دايرة ..وماريونت

واحدة واحدة عودتنى عالمتاجرة

والسهر قصاد النت ..ماهى ماريونت

وواحدة واحدة لقيتنى بزعق من المؤأمرة

بس إتاخدت .. ماهى ماريونت

لبستنى خزوق حكاية ماهى بنت حِنت

ولقيتنى انا خاين وواطى

ولبست ست .. ماهى ماريونت

طلعت عميلة من اللى ليهم

باع طويل ماهى ماريونت

علمتنى وشربتنى خيانه واضحة

بريال وسنت ..ماهى ماريونت

كلنا عرسان بخيط ماريونت

ماريونت
عرفتوا مين الماريونت

محمد فوزى

ضــــاق الحـــــــــــال

ضاق الحال

يارب ضاق الحال

فاغننى عن السؤال

واجعلنى غنى بك

يامن خلقت اليسر من بعد المحال

يامن خلقت الحب فى قلب الرجال

يامن خلقت الخير من روح الكمال

استجيرك فأجرنى ومن ذنوبى طهرنى

ومن خطاياى انتشلنى

يا من غفرت ذنوب كالجبال

يارب ضاق الحال

محمد فوزى

خــلاص نسيــــت

خلاص نسيت

مش هالومك خلاص نسيت

نسيت خلاص إحساسى بيك

نسيت كمان شوقى لعينيك

وكمان نسيت لمسة إيديك

كان زمان عمرى فى ايديك

دلوقتى مات احساسى بيك

من يوم ما مات شوقك وجيت

وقلت نبعد نفترق

وانا بدموعى بحترق

وبعدت عنى بدون ضمير

وانا قلبى يبكى عليك كتير

دلوقتى قلبى من بكاة

مابقاش يفكر فيك كتير

ومش هالومك على اللى فات

ما انا قلبى كان عندك حاجات

يوم ما ابقى اجيبها.. اكون حبيبك

ولو مكانش تبعد هواك

وانا مش هالومك على اللى فات

وانا مش هالومك ما خلاص نسيت

نسيت وقلت ان الحياة

والله ..مش واقفة عليك


محمد فوزى

أنا الشــــــــعب

الايديولوجيا المسيطرة واليوتوبيا الحالمة


- هما مصطلحان متداولان بشكل فلسفى اجتماعى وسياسى

الايديولوجيا واليوتوبيا

لنقوم بتعريفهما إن أمكن للبعض .

- الايديولوجيا : بكل تبسيط هى مجموعه الافكار والمعتقدات والقيم التى تسعى دوما للحفاظ على الوضع
- القائم فى أى مجتمع من المجتمعات بكل مافية وبكل ماتحملة الك الافكار من انتقادات او معارضات

فقط محاولة الابقاء على تلك النظم وتلك القواعد الراسخة .


اما اليوتوبيا : فهو مصطلح مخالف للأيديولوجيا فهو بكل بساطه محاولة التغيير ، تغير النسق القائم والافكار والقيم

والعادات التى ترسخت بفضل تبنى أحد الانظمه المسيطرة او الحاكمة على الفكر .


إذن فاليوتوبيا هى محاولة للحلم بالتغيير، مجموعة من الافكار التى لايمكن تطبيقها فى الواقع المعاش

فهى مكان لا يعيشة احد ، مكان من السعادة التى يسعى دوما اليها الحالمون مطلب من مطالب الحرية اذ قام النظام

السياسى والاجتماعى بقمع الحلم فى التغيير .


اليوتوبيا المصرية : -

هى احلام بسيطة احلام شابة

فرص للعمل وانتهاء البطالة الصريحة والبطالة المقنعة ، حياة بدون تعقيدات ، احلام بالاستقرار ، الزواج ، استقرار سياسى واجتماعى

احلام باختفاء الطوابير كطوابير العيش وطوابير المصالح الحكومية

أحلام بأختفاء العداء بين الشرطه والمواطنين تتلخص فى المعاملة الأدمية للمواطنين

انتهاء البلطجة وسيطرة رؤوس الاموال على مصالح المواطنون

انتهاء الاحتكار على شتى انواع السلع

عدم سيطرة حزب على باقى الاحزاب

امكانية سماع كل الاصوات ومناقشات هادئة تسير نحو تحقيق القييم العادلة

سيطرة الحق والخير سيطرة العدالة الاجتماعية

زوال الطبقية وتحقيق مناخ هادىء وحقيقى من الديمقراطية

اختفاء اللميعة والهتيفة ، الحلم بانتخابات حقيقية تعبر عنما يصول ويجول بداخل القلوب والعقول

على الهامش : وجدت ان معظم المهتمين بالانتخابات فى معظم الاحياء الشعبية من الهتيفة وممن لم يحصلوا على

قدر كافى من التعليم ، ولكن كل مايشغلهم خدمه مصالحهم سواء مصالحهم التجارية او رغبة فى التقرب من ذوى

النفوذ للفوز بالمكانة واتقاء الشرور شرور الدنيا ونكبات الخسارة فى مشروعاتهم التجارية الصغيرة ( اصحاب

محلات وتجارة ومقاهى وعاطلون ) هؤلاء هم الهتيفة .

وبالرغم من اتساع الهوة والمفارقة بين استخدام مصطلحى اليوتوبيا والايديولوجيا

الا انهما يمكن ان يجتمعا سويا فى شىء الا وهو ( ان يوتوبيا اليوم يمكنها ان تكون ايديولوجيا المستقبل )

- حلم ومش بعيد يتحقق لو كلنا أمنا بية لو كلنا سكتنا لحظه وادينا أدوار لبعضنا وسمعنا بعض بهدوء


ارجو ان تتحقق يوتوبيتنا وارجو ان لا نتمسك بها عندما تتحقق ، اذا وجدنا مايشوبها من اخطاء

ونرجوا من المستقبل ، ان يفتح لنا بابا من التسامح والاصغاء .

محمد فوزى

رفعت راياتــــــى

رفعت راياتى

رفعت راياتى فهل تقبلين حبى و أهاتى

رفعت رايات حبى وانهزاماتى

وتجرعت اكوابا من الصبر فوق احتمالاتى

وشردت وتهت فى ازمنه من فتوحاتى

اهديها لأجل عينيكى مع شوقى وقبلاتى

ووعود منى لكى

بأنك مليكة عمرى الماضى والأتى

وحب دائم ازلى

من الميلاد وحتى مماتى

ولكنى وجدت الغدر منك

فلا تعيبى الزمان وعيبى


غدرك انتى

يامن كنتى فى يوما مسراتى

رفعت راياتى ومضيت

استكمل فتوحاتى

وابحث عن

من يبجل يوما


اشواقى واهاتى

مع من يحارب معى

وتبهجه انتصاراتى

رفعت راياتى .

محمد فوزى

حد أقصـــــــى

حد أقصى

كل شىء فى الدنيا لية حد أقصى

واحنا اقصانا مالـــوش

متساب كدة لزمرة وحوش

متهان كدة واللى نقدر نعمله

شوية كلام .... وحبه رتوش

حـــلق وحـــوش

هو كدة طبع العرب فى الانتقام

سهام كلام .. ومدفعيه موجهه

بخــوف وانهـــزام

حتى الكلام .. مابقاش كلام

بقى همس بينا وبعضنا

لغه الاشارة فى دمنا

ومــات الكــلام

ولسه أقصانا مالوش حد أقصى

محمد فوزى

حـــــرب اللاشعور

حرب اللا شعور


إستيقظ من نومه كعادته وهو مايزال مغمض العينين ، راح يتحسس بجوارة على ( الكوميدينو ) علبه سجائرة وجدها ووجد فوقها ولاعته الفضيه فأشعل سيجارته وراح يدخنها وينفث لهيب دخانها فى وجه إمرأته النائمه بجوارة وكأنه تنين خرافى ينفث النيران فى وجه أعداؤة ، فاستفاقت زوجته من نومها وراحت تسعل وتشيح بوجهها عن دخانه الكثيف ، الذى كان يخرج ملتويا وكأنه أفعى تحاول الانقضاض عليها لتخنقها
كان يتمنى فى تلك اللحظة أن يشعل علبه دخانه دفعه واحدة فى وجهها .. لا بل كان يتمنى ان ينفث فى وجهها ألالاف من العلب دفعه واحدة ليصيبها بنوبه قلبيه مضاعفه من أثار التدخين السلبى فيرتاح منها ومن شجارها المستمر ومن سر تعاسته الأبديه والتى لن تنتهى لمجرد موت تلك المرأة التى اقترن اسمها بأسمه فى رابطه الزواج التى لعنها منذ يوم ان ارتبط بها مع تلك الشيطانه التى تتفنن فى إصابته بالاكتئاب يوميا

نهضت مسرعه وبحركه مسرحيه عنيفه قالت له " إنت مش هاتبطل أبدا تدخن فى الاوضه انا مش قلتلك ميت مرة تطلع تدخنها برة هاتموتنى ناقصه عمر "

فرد عليها ببرود شديد " وانا اقدر اعيش من غيرك يا حياتى مين كل يوم يعكر مذاجى ويعصبنى مقدرش مقدرش اعيش من غيرك " ينظر لها شذرا "

كان بداخله يمقتها يشمئز من رائحتها التى تملأ أرجاء غرفه نومه ، يكرة معاشرته لها برغم ان ذلك لايحدث الا فى المناسبات الغير سعيدة ( بالنسبه له ) واجب .. يقوم به من باب إثبات مافقدة من إحساس بالرجوله والتى فقدها مسبقا منذ اليوم الذى اختارها لتكون زوجه له لاحبيبه له هو قد قرر ذلك منذ اليوم الاول لزواجه بها

اختارها أقل منه علما وثقافه هى على قدر متوسط من الجمال لكنها تخضع كل امكانياتها لابراز مفاتنها بالقوة

هو ارادها غبيه حتى لاتفهمه غير جميله لانه لم يعد يرى نساء بعد ان فقد حبه الاول والاخير

يعاشر زوجته وهو صاحب الثلاثون عاما فى ريعان الشباب بأنفاس ثكلى مثقلة بالهموم ، فى صورة مرئيه تشرح مدى الانفصال الروحى والجسدى بينهما ،
هو مثقف بارز واع يملك مفردات ليس بها من مقومات الرجل الناجح عمليا ووظيفيا ، أما على النقيض فهى مضمحله الثقافه تقافتها لا تتعدى ثقافة البهيمه فى كيفيه البحث عن اللذة الحسيه من مأكل ومشرب وجنس

اللحظه الوحيدة التى التى تتحةل فيها من إمرأة متسلطه شرسه ذات انياب إلى مخلوق ضعيف هى تلك اللحظه التى تسبق انتهاءة من معاشرتها

تتفنن فى إمتاع نفسها فقط نفسها مايهمها ومايعنيها وماسوى ذلك فسحقا له ، أما هو فعزاة الوحيد انه فى تلك اللحظه من المعاشرة يتخيلها محبوبته التى ضاعت منه التى ماتت .. ولكن ، فى تلك اللحظه التى يدكها هى ( زوجته ) التى يدرك انها ليست محبوبته تخور منه شهوته فيضطر لمعاودة الكرة ثانيه ، مرغما لإشباع ذلك الوحش بداخلها أما هى فهى مستمتعه بذلك متمنيه ان يطول ويطول الوقت رغم علمها بما تحويه نفس زوجها من ألأم وبيكاء نعم بكاء فهو يبكى بداخله ، يقول هل هناك من هو اتعس منى فى تلك اللحظه التى يتمناها الجميع هلى هناك من على وجه الارض من يرفض ذلك أكثر منى ، وهى تعلم ذلك جيدا ليس قربا منه او تفهمها له لا وألف لا ولكنه هو نفسه من صرح لها بذلك برغم ذلك تريدة نعم تمقته لذكاءة لرجاحه عقله لثقافته لكنها تريدة كرجل تحب فيه رجولته المفرطه على الفراش فقط الفراش هو كل مايهمها

إتفاق اللاشعور

بدون وعى إتفقا كليهما على أن يلبى كل منهما احتياجات الاخر على الا يتدخل فى باقى شؤوون الاخر هو يلبى لها ااحتياجاتها الماليه والجسديه طبعا على مضض اما هى تلبى له مطلب واحد أن تتركه وحيدا بضع ساعات فى هدوء لينعم بالعزله او ليمارس اخر ماتبقى من تمسكه بالحياة ان تدعه يقرأ ويكتب اشعارة التى تعود ان يكتبها منذ الصبا

حيث كانت اشعارة يملؤها التفاؤل اما بعد موت حبيبته اصبحت رثاء وبكاء على الاطلال ، وكثيرا مناجاة لها وتصورها تحدثه فى كل موقف يتعرض له وكان مداوما على أخذ رأيها فى كل شىء مكتفيا ان يجلس بهدوء وحيدا وينظر لصورتها التى يحتفظ بها اكثر من احتفاظه بأى شىء فى دنياة يحاورها ويحدثها ويضحك معها ، تلك العزله التى يسترقها من الزمان ومن زوجته هى من تشحن له بطاريه عواطفه وتلهمه فى كثير من اعماله ، ولكن تلك الهدنه والعزله لاتدوم طويلا حيث تأتى زوجته تتفنن فى تنغيص الشىء الوحيد الذى يحبه ، من تصنعها اى موقف لتقتحم عليه خصوصيته بداخل مكتبه بدعوى اى شىء ولو كان ليس له قيمه مثل ، الحنفيه بتنقط تعالى اعملها بقالها يومين على دا الحال ، أو مش انا اتخانقت انهاردة فى السوبر ماركت مع الكاشير أل اية عايز يدينى بالباقى لبان وملبس وانا قولتلو ابدا هاخد الفكه يعنى هاخدها انت تجبرنى ليه على حاجة مش عاوزاها أل اية مش معاة فكه هما 15 قرش شويه يتسابوا فى الايام دى ، او باصطناعها ضحكات مدويه امام التليفزيون وهى تشاهد فيلما عاديا او برنامج مسابقات هزلى لذلك لم يسرى بينهما ذلك الاتفاق هو يفى بما وعد لكنها لاتفى فهى كاليهود لا وعود لها ولا حبيب لها

لكنه لا يمكنه هجرها لانها إبنه عمه الكبير فالطلاق معناة ان تقلب عليه عائلته فى الصعيد بالاضافه الى أن عمه هو من من يراعى له شؤون ارضه التى ورثها عن ابيه ويتحكم بها فمنذ ان ماتت محبوبته ترك الصعيد وقرر ان يعيش بالقاهرة ويعمل ويعمل حتى ينسى محبوبته وحب حياته ،

متناسيا بذكراها مأساته اليوميه والابديه زواجه التعس من تلك المرأة النكديه

محاسبا لنفسه ومستحضرامأساة كل الرجال فى كل الازمنه والعصور منذ بزوغ التاريخ وحتى وقتنا هذا بسبب رابطه الزواج الغير مبنى على التكافؤ مستحضرا تلك الحرب الللاشعوريه بين الذكر والانثى ومحاوله فرض الهيمنه والسيطرة من الطرفين ،لكنه بداخل نفسه لايحاول أن يقوم بأى سيطرة او مقاومه انه لايريد سوى سلاما ليعيش على ذكرى لن تنسى ولكنها اعلنتها حربا لاشعوريه عليه ،

وتسائل بداخله هل كانت ستوجد تلك الحرب اللاشعوريه بينه وبين محبوبته ؟
او هل توجد تلك الحرب بين المحبين ؟ وهل يمكنها تلك الحرب لمجرد إثبات الذات ان تمحوا الحب وتعصف به من أمامها ؟

أخذ يهيم على وجهه فى التفكير حتى اغرورقت عيناة بدموع على نفسه فهو يبكى بحرقه كالاطفال على حطام إنسان لم يتمنى فى يوم سوى الحب ان يعيش محبا ليس الا مع من اختارها ولكن القدر نازعه عليها وأخذها بقوة منه
وفجأة رأى طيف محبوبته أمامه بوجهها الصافى وبهيئتها الملائكيه تلوح له وكأنها ملاك حالم بديع الجمال اضاءت بنورها الكون

القرار

وجد ان مشكلته كانت ومازالت فى عدم وجود محبوبته بانتهاء أجلها وفى الحرب اللاشعوريه بين الجنسين الذكر والانثى ، اخذ قرارة وانتهى منه حيث وجدوة ملقى بجوار قبر حبيبته بالصعيد محتضنا شاهد القبر بكلتا يديه وبجوارة وصيته ان يدفن موضع ان مات وان تذهب أمواله كلها الى زوجته فهو قد ظلمها كثيرا بأختيارة لها زوجه له ولو انها تزوجت اخر لكان ربما ان تجد معه السعادة ، قرأت زوجته الوصيه وبكت

وقالت رحمه الله لو حاولت ان اقترب منه او احترمه او اتفهمه لما كان هرب منى اليها لما هرب من الحى الى من مات فالميت أبقى من الحى ان مات قلب الحى وعواطفه

تحياتى

محمد فوزى

عروسة صينى .. تسعدلى سنينى

عروسة صينى : تسعدلى سنينى

نيهاو( أهلا وسهلا بالصينى )
اهتديت بعدما فكرت وفكرت وقررت ان أتزوج صينية فالزواج من صينية وجدتة ان لة فوائد اكثر من فوائد السفر
فهى اولا سترضى بأن تعيش فى مصر ( طبعا علشان تسوق منتجاتها وتعمل سبوبة جانب الجواز )
تانى شىء الرجل المصرى بالنسبة لها طول بعرض بارتفاع ( حاجة كدة تملى العين الصينى الضيقة )
تالت شىء حنين وعاتيفى موت خالص ( مكسور الجناح ) لانة لا يجيد اصلا ألعاب الدفاع عن النفس كالكونغ فو فلن يسبب ذلك اى مشكلة لها يكفى انها تجيد كل تلك الالعاب

أما من حيث المبدأ فأنا أريدها صينية لعدة اسباب :

1- أجادتها لفنون القتال ( للدفاع عنى لو مرة دخلت معركة مع احد سائقى الميكروباص )
2 - مطالبها قليلة جدا ( من أكل لشرب نظرا لحفاظها على قوامها )
يعنى تضمن انها ماتفشولش فى المستقبل ولا انت كمان تضرب وتبقى ابو كرش ما انت هاتقضيها خضار وفاكهة وسوشى .

3 – ودى اهم نقطة ان حماتك هاتبقى فى الصين مش جمبك ولو جمبك ... الناس دول مش بتوع قعدة دول بتوع شغل مش هاتبرش جمبك
( تبرش ) هى كلمة من صميم حوارى مصر يعنى تفرش وتنام وتاخد راحتها عالأخر فى بيتك تنغص عليك وعلى اللى جايبينك وتطهقك فى اليوم اللى اتجوزت فية
4 – اة مهمة اوى برضو النقطة دى لا هاتطلب شبكة ولا فرح فى اوتيل خمس نجوم ولا اى حاجة بل هى ممكن تظبطك وتعملك فرح فى السفارة الصينية ببلاش ( وهايوزعوا فوانيس رمضان هدية فى الفرح وعرايس ودباديب وولاعات واقلام ومصليات بالبوصلة وأجهزة طبية وأبر صينية وأعشاب طبية )
5 – هاتساعدك فى أعباء الحياة ازاى دى بقى باختصار تظبطلها أوضة فى شقة الزوجية وتسيبها براحتها هتلاقيها عملاها مصنع صغير من الابرة للصاروخ وممكن كمان تصنعلك نووى لو مش مصدق جوة الاوضة الصغننة دى ، وممكن تستقيل من شغلك او لو انت عاطل اصلا يبقى هاتفيدك وتعلمك حرفة انتاجية ولا الحوجة لأى حد وهاتبقى معلم كبير ومش بعيد لو البلية جريت تتجوز اربع صينيات وتبقى من اكبر رجال الاعمال .
6 – عشرية مطيعة خدومة لا تكل ولا تمل مابتتعبش ( لممارستها لفنون اليوجا والرياضات الروحية وقراءاتها فى الفلسفات الصينية )

7 - مش بتاعة مظاهر يعنى لو مصرية هاتقولك لاء انا كنت عايشة عيشة فى بيت بابى غير كدة خالث لالالالا ياى وهى تلاقيها من حوارى .......... وطول عمرها حافية ، اما على النقيض الصينية تتشعبط فى اتوبيس تركب ميكروباص قوية كدة ومسترجلة وممكن تستوردلك توكتوك يغنيك عن سؤال اللئيم يعنى هاتتظبط هاتتظبط .

8 - إذا لام عليك اللائمون أن عينيها ضيقة فقل لهم لكنها واسعة الافق ، قصيرة الطول قل لهم انها طويلة المقام ، ملامحها حادة

فقل لهم عملنا إية بالانوثة الطاغية دا حتى تسيبها وماتخافش عليها من الفتنة ، لغتها صعبة فقل لهم دول بيتكلموا مصرى احسن منى ومنك وبتفاصل مع البياعين ولا كأنها تاجر شاطر وكلة بالادب وبالابتسامة اللطيفة مش بالصويت والجعير زى ناس ويجيلك ويحط عليك وإلهى ماتوعى تبيع ولا يباركلك ربنا لالالالا مفيش الكلام دا خالص

9 – محدش يقدر يغلبها لانها اصلا بياعة كلام موفرة تديها مصروف البيت ترجعلك الباقى وفوقهم بوسة وطبقين صينى
مش زى ناس تفضح أهلك وتقولك أأأأأأأأأأأأأأأأييييييييييية مصروف البيت مش مكفى أكل وتلاقيها ضربت الفلوس وكمان نص الاكل اصلا وهى بتضبخ أل إية بتدوق الأكل تدوق حلة رز وكيلو لحمة دا غير الخضار !!!!!! .

10- اسيبلكو انا الباقى تفكروا فية أما انا هانزل دلوقتى ادور على ... صينية البسبوسة بتاعتى اللى هاتجوزها

ولاعة وشعليلة قلبى ..




بدون مقارنة : فى داخلى البلدى بلدى حبيت بس اسخن الجو مع الاعتذار لكل الصينيات لهم منى كل تحية وتقدير

و شيشى للجميع ( شيشى ) = شكرا

إحنا بتوع الاتـــــــوبيــــس

إحنا بتوع الاتوبيس


أتوبيس حياتنا مليان

من كتر حِملة زهقان وتعبان

مايل بجنب

ماشى بيعرج

وكأنة أنسان من زمان

هدة الزمان ودوبة

من كتر لفة فى الشوارع والميادين والحارات

شايل فى حضنة ناس كتيييرة

برضة زية تعبانين.. شقيانين فى المدينة

هو بيصرخ منهم.... من حملهم

وهما واقفين ينفخوا ... من زنقتة

ودوشتة وطول طابورة

لاهما طايقينة ولا.. ولا هو طايق

واقف حرامى مهمتة ..

الاحتفاظ بالمحافِظ والبطايق

حتى لو إحنا مفتحين

من الحر كل الناس تزمجر ولا حد طايق

زيتنا فى دقيقنا جوة اتوبيسنا العزيز

سلوتنا تزنيقة وبصة ... سبحانه البديع

دى بنت إية اللى زنقها ... يكونش دا هو مزاجها

دى كلمه قالها صاحبى عبد البديع

يا نهار بديع !!!!!!!!

واللى مطاقش الزنقة ... يجرى ينط يفط

ياخدلة تاكسى ولا ميكرو ولا مترو ينط

عرجان زى اتوبيسنا العزيز

ومش لذيذ

لانة فاصلين الحريم عن الرجال

دى جبة وقفطان ودى بدلة وبجامة ترجال

وهى هى زنقتة مفهاش فصال

واللى يحب يهج يكون من الرجال

ياخدلة مركب ترمية بقسوة وسط البحور

مش فارقة مات ولا غرقان .. سيبة يغور

ولما ترجع جتتة يقولو شوف

مرضيش بعيشتة الحزين

عليك وعلى كل اللى جابك

يلعن ويحرق سلافين جدودك واللى جابك

مرضيش بأتوبيسنا العزيز

أبو زحمة تسعد الحزين

ابو عرجة مرجيحة وبابين

تحب تنزل يقلبك قبل ماتنزل

لا تقول فى سِيرك تقوم وتعمل شقلباظ

لا تقولى توكتوك ولا حتى ميكروباااااظ

واحنا بتوع الاتوبيس

ابو عرجة تشرح قلب كل عانس او عريس

تحياتى : من جوة الاتوبيس