شىء غريب
شىء ملح جوة قلبى بيقولى ازعق فى السكوت
شىء ملح جوة صوتى بيقول ابكى بأعلى صوت
شىء غريب جوايا صاح .. شىء غريب مش نور صباح
شىء غريب جوايا ثار بيقولى ارفض الجراح
جوايا شىء مش عارفة لسة ... شىء عجيب بيقولى إقسى
شىء غريب بيقولى إرفض ... تبقى تابع فوق وإنسى
شىء بيترجانى ارفض ... بيقولى ازحف قوم واركض
شىء بيطلب منى اعافر ... بيقول ربى ليك ضوافر
قوم وانهش حب والطش اضحك واقفش دادى وانكش
شىء بيطلب منى اطبطب ابقى قاسى وابقى طيب
بيقولى دوس اضرب وطيب بعدها هاتكون كبير
مش ناوى احب مش ناوى اغير ... مش ناوى اكون من غير مصير
مش ناوى اكون تابع واكون انسان حنون حب بجنون
والحب لية بيكون نهايتة يكون معاة نهاية المصير
مش ناوى اكون انسان مالوش نفسى اكون وسط الوحوش
كبير وهاكبر وسطهم وبكرة اكون من قبلهم
وبكرة هاتلذذ بكونى اقوى واحد منهم
بكرة هاتلذذ بكونى حد ينهش لحمهم
زى زمان ما أذونى اة ..وكنت بضحك للحياة
كنت بضحك على خيبتى يمكن او بموت منها الحياة
بكرة اكتب بدمايا اسرار مشاعرى وأكون معايا
يا اما هاخسر نفسى يمكن ...وبرضوا مش فارقة معايا .
12 comments:
ده صوت رفضك لكيانك او لتصرفات لك
بس اوعى توافق عليه الا لما تكون هادى
appy :
فعلا يا appy انتى حللتى كلماتى صح دا رفض لكيانى بالكامل رفض للضعف اللى جوايا رفض لكل القيم اللى عشتها وعلمتنى احب واصارح واكون نضيف ، مش هاتسرع بس هاكون حريص
تحياتى ليكى دايما موجودة جمب اصحابك
حلو قوى الكلام وبيوجع شوية
السلام عليكم...
.........
كما عودتني دوما كلمات بمنتهى الروعه..
ولاكن ..
يا اما هاخسر نفسى يمكن ...وبرضوا مش فارقة معايا .
إلا خسارة النفس أخي ..
إلا هي...
..............
كل عام وأنت بخير ..
وعيد سعيد..
ولاعمرك هتعرف تكون كدة عشان انت مش كدة بتقول هبقا وهبقا وهبقا وهكون بس في الاخر بتغلب طبيعتك الطيبه اللي جواك
كل سنه وانت طيب
سلامي ليك وكل الود يامحمد
كل عام وانتم بخير :)
enjy"
كل سنة وانتى طيبة وشكرا لمرورك وعذرا لتأخرى فى الرد
كل الود تحياتى
m.k:
وعليكم السلام ورحمة الله وبركاتة
كل سنة وانتى طيبة جت متأخرة شوية كنت مشغول فى اللحمه الحقيقة
تحياتى :)
tota:
وانتى طيبة وبألف خير يا توتا
جيتى عالجرح الحقيقة :(
تحياتى
أقصوصة :
وانتى بألف صحة وسلامة
كل التحية وشكرا على المرور الكريم
ويارب دايما ايامنا أعياد فى أعياد
السلام عليك
ازيك يا محمد كل سنه وانت طيب
طبعا الكومنت بتاعى انت عارفه ..لان انا من اول الناس اللى سمعتها من قبل ما تنشرها(بتمنظر حبتين)وانت اعتقد فاكر ان قولتلك ان ده مش انت ..هوه حلو اننا نرفض الضعف عامة بس الكلام ده جامد وحاد قوى,وانا عارفه محمد مش فى احن منك..
عامه كلامك بغرم حدته لكن نفس اسلوبك الجميل..وكل سنه وانت طيب يا فرعونتى..وابقى تعالى المدونه كتير لانها بتبقى مضلمه من غيرك
اختك ميرا المصريه
ميرا المصرية :
وانتى طيبة يا عروسة النيل وانشاء الله نفرح بيكى قريبا انشاء الله
انا عارف ان الكلام حاد حبتين لكن كانت ليها ظروفها وانتى فاهمة دا اكيد
سعيد جدا بتواجدك وظهورك على ساحة التدوين اللى بجد هاتفيدك جدا وربنا معاكى
يــــــــــــاة من زمان ماسمعتش فرعونتى دى
تحياتى
الفرعون العاشق
Post a Comment