مع نفسى بقول

العدم

خطيت كل الحدود
وقابلت كل شىء له صوت ووجود
وقلت للعدم
ناقصك وجود وحدود
ارسم طريقك بأيدك
وكون وجود موجود
يا عدم ازاى تكون موجود
الا ان تكون ليك بصمه
فى الموجود

_____________________________________________________

يا قلم

يا قلم هز الورق بالكلام

عاجبك ورق فاضى

بكلام اوهام
عاوزك تخط بحبرك
كلام
مايخافش من0 100 كرباج ولجام

______________________________________________________


يا أمل

خليك معايا يا أمل خليك
دا انا ماشى بخطى مرسومه
من بعديك
ازاى تسيبنى لوحدى
امشى بخطى ضايعة
دا انا قلبى كان فرحان
وخطاة متونسه بيك

محمد فوزى

عزيزة

محدش فينا مش بيحب مصر كلنا بنحبها واكتر واحد بنحس انه بكتب عنها وهو دايب فيها شوق زى واحد بيتغزل فى حبيبته واكتر كمان هو شاعرنا الجميل احمد فؤاد نجم ( النجم ) ساطع دايما فى سماء العشق الصوفى للوطن اتأثرت بيه فى اخر كتاباته وهى ( عزيزة ) ويقصد بيها مصر استفزتنى كلماته الجميله وكتبت وندهت على عزيزة معاة ودا نص الكلام

دى عزيزة بتاعه عمى ( احمد فؤاد نجم )
دوقينا يا عزيزةحته من مصر العزيزة
حتى لما بتبقى شايفه وعامله خايفه بالغريزة
هى دى مصر اللذيذة ودوقينا يا عزيزة

دوقينا بالامارة لما يمشو الناس حيارى
والوطن يسكن عمارة
والعمارة تبقى حارة
والحوارى ... ياما فيها ... واللى فيها مش كافيها

بس لما الوعد يحكم ييجى عاليها واطيها
هى دى مصر اللى باقيه بالغريزة يا عزيزة
احمد فؤاد نجم

______________________________________________________

ودى عزيزة لما انا كلمتها

يا عزيزة جاوبى عمى على الكلام
ودوقينا كلنا.... كدة بالتمام
ودوقينا .... ومتخافيش وحطى صورتى على الافيش
وقولى هو اللى قالى .. لأى ظابط او شاويش
ومتخافيش .. ياعزيزة سيان اموت ولا اعيش
بس ادوق مرة واحدة طعم بلدى
وبعدها مش فارقه لحمه او قريش
ومتخافيش

بعدك انتى والله حاسس من زمان مابشتهيش
حاسس انك ضايعه منى .... اوعى يوم ماترجعيش
وياعزيزة صدقينى ... ياعزيزة
حبك اقوى من الغريزة وجاوبى عمى يا لذيذة
يا عزيزة

محمد فوزى

طبعا محدش يقارن كلامه بكلامى انا لسه مجرد طفل بزحف وبحبى فى محراب حب شاعرنا الكبير
ليه منى الف تحيه وسلام

انـــا والنــــاس

انا والناس

وحيد... مع انى بين الناس

وكأننا بنتلاقى... لكن بغير احساس

وحيد وبين ضلوعى كلام

ضايع فى وسط زحام

و ألام وراها ألام

ولا حد يسأل ليه .... تهرب كدة الاحلام !

ولا حد يوم دور... ولا حد يوم فكر

يفهم ويتصور

يقرا كتاب اليوم او حتى يتغير

وليه هنتحير... ولمين هانتغير!

لو كلنا خايفين نتلاقى ونفكر

لو كلنا قايلين قسمه ومتقدر

عايشين سوا مع بعض لكننا شاردين

ما الحب مات مافضلش الا صراخ وانين

ولا حد يمسح دمعه ولا يوم سألنى انا مين !

انا عشق كل حبيب انا حب لكنى غريب !

تايه فى وسط حبايبى وشمسى وسط مغيب

انا رحله فى الايام انا ضحكه الاحلام

مولود بشوق وغرام لكن مكانهم فين !

مولود انا فى الغربه والناس قلوبهم صعبه

ماتعرف الا القسوة

وانا قلبى راسم رسمه

وردة وطفل وبسمه

من الحزن والقسوة

احلامنا شافت ويل

ماهى حلم قلب عليل

محتاج لنسمه ليل

محمد فوزى

معايا ولا مش معايا

معايا ولا مش معايا

مش فارقه تبعد عن هوايا

ضحيت كتير فى سنين صبايا

واخترت اعيشلك للنهايه

اخترت اعيشلك ويا نفسى

ويبقى همسى وكل شمسى

ويبقى امسى ...... صمتى وُبكايا

معايا ولا مش معايا
.............
اوعدك فى هواك معايا

اوعدك هاتكون حكايه

اوعدك هاتكون بدايه
.............
اوعدك بهواك هاتبقى

جوة قلبى فى كل دقه


وعمر يوم شوقك مايهدى

من هواك احلامى شاردة

معايا ولا موش معايا
...........
ولو معايا هاتبقى سِكة

طول طريق عمرى اللى عدى
................
ولو معايا هاتبقى رحله

نمشيها... وتكون البدايه

محمد فوزى

ضاع الاخلاص

بس خلاص ..... ضاع الاخلاص

كل شىء فى حياتنا خلاص

مافيهوش اخلاص

اخلاص ... ماخلاص دى كلمه قديمه وراحت

مالهاش اى اساس
الدنيا بتفوت احلامنا بتموت

مش فارقه الدنيا بتجرى...

ولا حتى الوقت يفوت

اخلاص احساس وكل معانى الدنيا

خلاص
ضاعت بين الناس

احساس ما خلاص
دا كمان برضو مالهوش مطرح... بين الناس
والناس .. تتصور ... عايزينا نتغير
ونتوة.. وندوروالله دى حاجه تحير
دا طريقنا منا يفوت
والحيرة ... جوانا
ماخلاص... يا هوانا
اخلاصنا وحيد جوانا

مكبوت مالهوش صوت
واهوعايشين

مش فارقه ولا حتى نموت

محمد فوزى

ركبُ الخطايا

سائرً ركبُ الخطايا

حامل ً ذنب البرايا

ماضيا ً اروى الحكايه

امل ًًٌُُُُ حسنٌ النهايه

جاثيِا ً ادعو الرحيم

باكياً ذنب ٌُُ عظيم

نادمٌ ابغى الكريم

رحمه ٌ صِفة َ الرحيم

سائرً ابغى الجواب َ

والدعاء َ المستجاب

باكيا ً خوف ُ العذاب

راجيا ً حسن ُ المأب

والصراط َ المستقيم
محمد فوزى

افلا اكون من الشــــاكرين

افلا اكون من الشاكرين


الانسان دا سبحان الله بجد مايميلاش عينه غير التراب ، فعلا ليه مش بنقول الحمد لله فى السراء والضراء؟

ليه نتمنى اشياء واشياء ونحلم، ولما ربنا يحققهالنا منشكرهوش على عطاياة الجميله اللى بيمن بيها علينا.

نتمنى نكبر وبنكبر ومنشكرش، نتمنى ننجح وبننجح ومانشكرش ، بنتمنى نشتغل ونبقى يااااااااة هانتجنن ونعيش حاله

احبااط، وبيكون امتحان من الله لينا على الصبر ، وننساة ، طيب ماندعى ونبتهل ونبكى فى حضن ربنا واحنا بنصلى
ونتمرمغ من البكاء ذلا امام الله،بس اللى بيحصل العكس بنشكى لغير الله ودا قمه المذله، الشكوى لغير الله مذله .

اة يبقى البكاء لله مش ذل ، بالعكس هو رجاء.. تبتل... ابتهال... مناجاة... حاله بنعيشها وبنكلم فيها ربنا ، وبنطلب منه

، حد يعرف ان مناجاته لربنا نوع من انواع الاتصال الروحانى بنقرب من ربنا اوى فى اللحظه دى وخصوصا

واحنا ساجدين لربنا، بنقرب منه جدا جدا ( واذا سألك عبادى عنى فأنى قريب اجيب دعوة الداعى اذا دعانى فليستجيبو

لى وليؤمنو بى لعلهم يرشدون ) دى رساله من الله لينا علشان نكثر من الدعاء ولا نتوسل بغير الله لان الله هو العزيز

القادر الذى قالى فى محكم تنزيله ( ولئن شكرتم لازيدنكم ) يعنى ندعى ونبتهل ونتوسل بالله فقط وايضا نشكر الله على

السراء والضراء ، وطبعا كلنا واخدانا دنيتنا وبننسى وبنلعن اليوم اللى اتولدنا فيه وبنشتم الدهر ولكن ما الدهر الا الله


حاله غريبه: حاله غريبه بتتملكنى الايام دى احلام كتير حلمتها طول عمرى ولما تتحق ليه مش حاسس بالسعادة؟


مثلا كان عندى امل انى امضى ثلاث عقود عقد الشقه وعقدالوظيفه وعقد الزواج ومؤخرا حققت منهم اتنين اللى هما

عقد الشقه وعقد الوظيفه اما الثالث فبسعى لامضاءة بفضل الله وربنا ييسر ،ولكن ايه سبب عدم الفرحه والبهجه اللى حاسس بيهم

حاليا ؟ ايه سر عدم لامبالاتى يوم ماكتبت عقد الوظيفه اللى طول عمرى بحلم بيه وانتظرت 6 سنوات بعد التخرج

علشان امضيه وايه سر عدم فرحتى بعقد الشقه بعد ما دخت فى رحله البحث عن شقه او مسكن ؟ الله اعلم


بشكر ربنا اة طبعا لانه وقفلى ناس طيبين فى سكتى ساعدونى ، بس ليه بقى الفرحه ماتكتملش سبحان الله ..... نعمه

الشكر والرضى دى نعمه كبيرة جدااااااا جدااااااااا يارب نولهانى يارب واجعلنى من عبادك الشاكرين الحامدين

الذاكرين كنت زمان بقول يااااااااة حلمى دا لو اتحقق دا انا هابقى اسعد مخلوق على الارض انا برضى بقليلى ... طيب

دلوقتى ايه اللى حاصل ؟
مش فرحان ليه مش يمكن المسؤليه لما تزيد الانسان بيخاف يفرح ؟

يمكن خايف من اللى جاى لانه اصعب ؟

خايف من الخوف فى حد ذاته ومش عارف ايه السبب ؟

يمكن انا موهوم وواهم نفسى بحاجات مش موجودة .؟

يمكن يكون ربنا بيمتحنى وبيقولى افرح واشكر غيرك موش لاقى ؟

حققت جزء كبير من احلامك ( قد يرى البعض احلامى اشياء لاتذكر لكونها ضئيله ولكنها عندى اشياء هائله الحجم لاننى تعبت فى تحقيق ادق التفاصيل فى احلامى )

يمكن دى طبيعه بشريه فى الرغبه فى المزيد الرغبه فى الامتلاك ؟

قال تعالى فى حديثه القدسى ( لو ان لابن أدم واديا من ذهب لاحب ان يكون له ثانيا ولو كان له ثانيا لاحب ان يكون له ثالثا ولا يملأ عين ابن أدم الا التراب ويتوب الله على من تاب )
يمكن الضغط العصبى اللى بتعرض له سبب ؟

الله اعلم ولكنى بحاول اكون من عباد الله الشاكرين ( ولئن شكرتم لازيدنكم ) صدق الله العظيم

الحمد لله على نعمه التى لاتحصى .

يبقى نحاول نرضى كلنا بمقسومنا ونشكر ربنا على النعم ونسيب اللى جاى لصاحب الملك هكذا قررت عدم الخوف بما قد سيأتى ، وسوف ارضى وسوف اكون من الشاكرين بحق .

محمد فوزى