خذو الحكمه من افواة العاطلين

خذو الحكمه من افواة العاطلين


يا مصر اصحى وصحى كل الموجودين
دا طريقنا كان مليان بالناس الطيبين
مافضلش منهم الا شويه ضغيرين
وشباب عجايز وهما صغيرين
احفاد فراعنه وقبط ومسلمين
ماشيينبنبكى فى غربه وحنين
متجمعين متفرقين
فى قلوبنا احنا المجروحين

دى مجموعه ابيات كتبتها انا وصديق لى بعد تخرجنا الكليه وحصول كل منا على لقب عظيم هو لقب عــــــــــاطل كنا فعلا مخنوقين كنا فعلا حاسين اننا انضحك علينا وتعليمنا راح بلاش

· رحله البحث عن وظيفه ( سورى رحله البحث عن واسطه )

بدا البحث مباشرة بعد ما خلصنا الكلمه المألوفه اللى كنا بنسمعها ونضحك عليها فى الراديو ( فوت علينا بكرة )

بقت تتقال لنا كل يوم من الشركه الفلانيه للوزارة العلانيه وهكذا دواليك وبدأنا ندور على واسطه لكن بالخبرة كدة اكتشفنا ان الواسطه برضو درجات اينعم درجات وهل يستوى الاعمى والمبصر لاء طبعا ومحدش بيخدم ببلاش كله بتمنه يا معلم ويا معلم دى لقب تانى حصلت عليه بعد لقب عاطل ولم تصدق كل الوعود كما هو متوقع

فكرت انا وزمايلى فى كل الطرق المشروعه للشغل وفى بعض الاحيان للطرق غير المشروعه ودا كان حل اخير لما خلاص نحس اننا هانشحت ومش شرط نشحت بس الخنقه من الوضع والناس يااااااااااة وصلت منتهاها

لاننا لقينا الناس بتتعامل بحقد شديد جدا معانا او على العكس تماما على اننا من ذوى الاحتياجات الخاصه او احد العاهات ( معلهش يابنى بس مش كان ابوك دخلك صنايع اتعلمتلك صانعه احسن لك ) طيب واللى مايعرفش يتعلم صنعه يعمل ايه انا حبيت الادب ودرست الفلسفه اعمل ايه يعنى نصيبى نصيب ايه يابو نصيب ( دا رد احد الموظفين فى احد الوزارات ) اتعلم صنعه احسن .

فكرنا بما اننا لانعرف صنعه اننا ممكن نشتغل اى عمل حر بدا من مشروع سايبر الى سنترال اتصالات وانتهاءا بمطعم تقلص مع مرور الوقت واكتشافنا للتكلفه وصل الى عربيه فول فى اى ميدان عام وبرضو مانفعش اصل برضو المشكله التكلفه وبرضو الحقيقه نفسيتنا كانت بتقوم علينا لما نستترجع الماضى ونبكى على اطلال 14 سنه خدمه فى التربيه والتعليم ينتهو ويتنقعو جوة قدرة فول كان صعب علينا حبتين لامش حبتين قول شريط حبوب وفعلا من منا فضل ضرب الحبوب على بيع الحبوب وضرب شريطين حبوب وربنا ستر واتلحق الشخص دا كان انا ودى مكانتش حالتى لوحدى دا كله ادب زى حقوق زى علوم زى طب المصيبه ان الاهل مش فاهمين يقولو لو كنت دخلت تجارة كان زمانك اشتغلت فى اى مكان التجارة ليها مستقبل ( علما بأن العائله كلها محاسبين وموظفين ) انا اللى فاقد ودخلت اداب قسم فلسفه اقول ماهو كله زيى حتى الطب بقى مندوب مبيعات بيلف على الصيدليات دا لو لقى يعنى شغل

كله سواااااااااء على القهوة مرصوصين بشكل جميل اة نسيت من الجدير بالذكر توجيه التحيه للمعلمين اصحاب القهاوى على رعايتهم لينا واحساسهم الدافى بوجيعتنا من توفير شيش مدعمه ننفخ فيها همومنا وتوفير الجرائد وخصوصا الاهرام يوم الجمعه باب ( وظائف خياليه ) اقصد خاليه والبحث معنا على وظائف من باب التعاطف وجذب الزبائن من شباب المستقبل دا غير جيل المستقبل بتاع اعلان التليفزيون بتاع شباب النيل هووووة هوةةةةةةة الواحد كان بيشوفهم بيتعقد من البدل اللى لابسينها الحقيقه .


افلاطـــــــــــــــــون عاطــــــــــل :

مشهد فى احد اتوبيسات الهيئه متشعبطين ومتزنقين وربنا مايحكم على عدو ولا حبيب فجاة واحنا مسترخيين ومستمتعين باللحظات الجميله لاننا بندور فى احياء مصر المهروسه وتكييف اتوبيس الهيئه

شغال وعال العال مش عارف ليه الشكوى مع ان الناس كلها ريحتها حلوة وبرفاناتهم مش موجودة حتى فى باريس وحصلت خناقه مع الكمسارىوهو شاب فى اواخر العشرينات وصرخ باعلى صوته حرام عليكو انا ليسانس اداب حرام اللى بيحصل دا كل يوم خناقات انا لو اشتغلت حرامى يبقى اكرملى نظرت لصديقى وضحكنا ضحكه تهكميه وقولنالو كابتن استهدى بالله واحمد ربنا وبحركه مسرحيه منى قولتله انت جيبت واسطه ازاى ....... بص لى وكان هايرمينى من الاتوبيس لكن عندما رأى البراءة فى عينى وجدته يبتسم

فقال لى صديقى عارف المشكله فين احنا دورنا فى كل مكان واتبهدلنا واتشتمنا كمان ايوة انا اتهنت

واتبهدلت واشتغلت كل حاجه واستحملنا الاهانه لكن مفيش فايدة قالى كلمه عمرى ما هنساها

( اهلنا زمان نحتو فى الصخر شقيو وتعبو بس علمو فى الصخر لكن احنا بننحت فى الهوا واللى بينحت فى

الهوا مابيعلمش ) يالله كلمه بجد جامدة ما اتعلمنهاش فى كتب الفلسفه ولو افلاطون كان موجود دلوقتى فى زماننا كان زمانه عاطل ومش عارف يجيب واسطه . وجتنا نيله فى حظنا الهباب .


معلش طولت عليكو بس ناقص حته صغننه استحملونى انا اصلى معبى وبفضفض

شىء فى صبرى :
ماشى هانسلم اننا اشتغلنا برغم ان القطاع الخاص وما ادراك بالقطاع الخاص فى البهدله واللى مش عاجبه يغور واعلان بربع جنيه فى الجرنال ييجى ملايين ما علينا حط جزمه فى بقك واسكت اوكى

اهلك بيساعدوك وانت بتشتغل شغال ماشى طيب كل شويه يقولولك عاوزين نفرح بيك نفرح بيك طيب ازاى والنبى ازاى نتجوز واحنا عندنا عجز لا ماتفهموش غلط انا اقصد ع
جز فى الميزانيه ماشى هانقضيها جمعيات ومساعدات خارجيه ومعونات داخليه طيب لو اتجوزنا فرضا فرضا على الرغم من انى نفسى البس دبل بس قبل ما اموت على رأى احمد رزق فى فيلم ثقافى هاعيش انا والمودام ازاى معونات برضو اوكى شغال برضو اهو مش احسن من الانحراف طيب ماذا لو ربنا كرم بحته عيل ولا نصيبك يجيلك توينز مين هايربى العيال هايعيشو ازاى ( اصل انا حاسس بمبادىء ذبحه صدريه من كتر التوفير واكل الفول والطعميه طيب لينا وللعيال رب كريم بس السؤال هنا

لما احنا حالتنا كدة ومش عارفين نعيش ولا نتشتغل ولا نتجوز الجيل اللى جاى هايبقى حالته ايه ؟
هايعيش ازاى ؟ هايشتغلو ايه ؟ انا هاتجنن