مشكله العنوسه فى مصر المحروســــه

البنات عايزة ايه ؟ ؟ ( عريس على المقاس طول بعرض وابن ناس )

فى ايامنا دى وايامنا الجايه كمان بتختلف مطالب البنات وبتتغير . طريقه التفكير اسلوب الحياة اللوك او الطله

او النيو لوك . اذن اتسائل هل البنات بتدور على الموضه الجديدة ولا بتدور على الفكر الجديد ؟

ولا بتدور على بوى فريند جديد ؟

الله اعلم حاله من التوهان والضياع بتمر بيه البنات الان مش البنات بس الحقيقه لكن كل الشباب

بس البنات اكتر .

الجواز ولا اثبات الذات ؟ تقولك البنت لاء جواز ايه اثبات الذات ويوم ما سن البنت يعدى ال 25 ياأخبببببببر

الحقو هاتو عريس بسرعععععععععععه البنت هاتبور زى الارض اللى بارت وساعتها الباير تبقى اولى ؟ ببيت ابوها .

طيب لما البنات كدة كترت اوى وموش لاقيه جواز

مشكله العنوسه فى مصر المحروسه

لما كدة البنات بتكبر فى السن وبيحصل مشكل لا حد لها ولا حصرلها والشوارع تشهد وابوباب الجوامع تشهد برضو وشارع جامعه الدول العربيه يشهد ، ليه بقى مزنقينها على نفسنا .

وتروح تخطب البنت من دول وتقول اكمل نص دينى تلاقى ان الرد اللى بيتقالك يطلع النص اللى كان عندك ويطفشه : ( عرض المطالب )

اولا : شقه تمليك ( فى مصر الجديدة / مدينه نصر المهندسين انشاء الله )
ثانيا : شبكه تمليك ( لان دلوقتى ظهر انواع جديدة من الشبكه الايجار بتتأجر زى الفستان كدة ليله واحدة وترجع تانى ) وطبعا دى ظهرت نتيجه للمنظرة الفارغه ناس موش لاقيه تاكل وتقولك لاء نأجر شبكه بقى ايجار وخلاص هو نصيبنا كدة وقعنا فى عريس منيل مش لاقى ياكل نأجر (شبكه اليوم الواحد ) الناس تشوفها وتزغللهم فى الفرح ونبقى نقول ان العريس اتزنق بعد كدة كان بيعالج امه واى كلام وخلاص واى منظرة والسلام ودا طبعا لان قيمه الشبكه التمليك دلوقتى حدث ولا حرج .

ثالثا : فرح فى فندق : خمس نجوم ***** ( انتر كونتينينتاك / او خالتك او اى فندق اى شاب من عائله متوسطه ميحلمش يشرب فيه كوبايه ميه ساجعه ) .


رابعا : بعد كل اللى فات لسه التقيل ورا ( غرفه النوم والمطبخ والسفرة والسجاجيد والنجف والتحف والتنجيد والتنفيض على العريس ) حلوة دى طيب والعروسه........ لاااااااااااا العروسه مابتجيبش غير شنطه هدومها والكياس البلاستيك وسكينتين واحدة تقطيع والتانيه تشفى هههههههه .

طيب اشربو بقى اللى عايز الجواز بقى يجيبلو معلقه .

وبتقولو العنوسه زادت ماهو لازم تزيد وتفيض وتغرقنا ومشاكلها لازم تظهر

ومن ردود فعل العنوسه :

الافراح والليالى الملاح

تروح الفرح من دول تلاقى البنات كلها واو حاجه كدة نازله من هليوووود

شعر وميكب وروجاجو وايلاينر ومسكرة وحاجه زى الفل تزغلل ، ويبدأ الفرح واتفرج يا سلام فاشون شو و فساتين ايه وبيرفيم , ورقص على كيف كيفك

وكل واحدة عاوزة عريس على المقاس طول وعرض وابن ناس

وكله يغنى ( حد عايز قلب فاضى قلب طيب قلب هادى قلب كله حنان وعطف يخطفك من الحزن خطف قلب نفسه يحب حتى قلب عايز ينسى ماضى )

وصباح السهوكه وسلملى على دوللى شاهين ( انا غير كل البنات اللى انت عرفتهم) .

تانى حاجه : الانترنت

البنت على الانترنت بتبقى حاجه تانيه خالص شخصيه وايه تحولك من كلامها وردودها وتطلع عينك على ماتديلك الموبايل وهو مع نص شباب القاهرة الكبرى بضواحيها وتكلمها فى الاخر يا خبرررررررر كلامها كدة نصه انجليزى على فرنسى على لغه عجيبه من اللغات اللى انت مسمعتش عنها وتقول وووووووووواووو دى بنت ستايلش ومن الاخر تطلع من بولاق ( خالص تقديرى لشباب وبنات بولاق ) العيب مش فى المنطقه العيب فى اللى بيعيش عيشه غير عيشته وبيخرج من جلباب الحاج باباة ودا موش للبنات بس دا للشباب كمان
تلاقى الشاب من دول لابس وفانكى وروش طحن وموبايل حاجه تخبل ومفيش فى جيبه غير سيجارتين فرت كليوباترا .

طيب على ايه المنظرة على ايه نعيش على بعض كلنا ظروفنا على قدها ليه موبايل ب3 الاف ليه سجاير اجنبى وانت بتشحت ليه شبكه ب5 وعشرة ودا اقل حاجه ليه شقه تمليك فى الزمالك ليه فرح 5 نجوم ليه تكلفه مالهاش لازمه ليه؟

ليه بنحب نأزمها على نفسنا طيب اهالينا وليهم دماغهم احنا بقى نكسر القيود دى

مشكلتنا كلنا اننا مش بنعرف نتكلم عن مشاكلنا بنحب نحط رجل على رجل فى وش اللى قدامنا وبنتكبر على بعض بشكل بشع ، وأدى النتيجه الشعب المصرى لم ينجح احد مشاكلنا يتزيد وهمومنا اكتر موش على مستوى الجواز والعنوسه لا لا خالص
دا على المستوى الاخلاقى كمان زاد الفقر والسرقه والغش الميك اب غطى وشوشنا
الانحراف زاد بين الشباب والعهر والعرى والبطاله وربنا يسامح ناس اباحو عمليات الترقيع عشان الشباب تنفس عن رغباتها وربنا يستر على اللى جاى
محدش بقى ضامن يشترى بطيخه ويفتحا تطلع قرعه :)।

ولنا الله

محمد فوزى