انا والناس
وحيد... مع انى بين الناس
وكأننا بنتلاقى... لكن بغير احساس
وحيد وبين ضلوعى كلام
ضايع فى وسط زحام
و ألام وراها ألام
ولا حد يسأل ليه .... تهرب كدة الاحلام !
ولا حد يوم دور... ولا حد يوم فكر
يفهم ويتصور
يقرا كتاب اليوم او حتى يتغير
وليه هنتحير... ولمين هانتغير!
لو كلنا خايفين نتلاقى ونفكر
لو كلنا قايلين قسمه ومتقدر
عايشين سوا مع بعض لكننا شاردين
ما الحب مات مافضلش الا صراخ وانين
ولا حد يمسح دمعه ولا يوم سألنى انا مين !
انا عشق كل حبيب انا حب لكنى غريب !
تايه فى وسط حبايبى وشمسى وسط مغيب
انا رحله فى الايام انا ضحكه الاحلام
مولود بشوق وغرام لكن مكانهم فين !
مولود انا فى الغربه والناس قلوبهم صعبه
ماتعرف الا القسوة
وانا قلبى راسم رسمه
وردة وطفل وبسمه
من الحزن والقسوة
احلامنا شافت ويل
ماهى حلم قلب عليل
محتاج لنسمه ليل
محمد فوزى
20 comments:
الاحساس بالوحده وسط الاف هو اصعب احساس بالوحده
ولو كنت وسط كل اللى انت عارفهم دا بيبقى شعور قااااااااتل
باقولك ايه ماتدورلى على ملحن واغنيهالك؟؟؟
:P
وينكى :
حبيبه الكل :(
اصعب احساس هو الشعور بالوحد فعلا وسط الناس والاصعب لو كانو ناس بتحبيهم مش مجرد تعرفيهم وبس ،
عارفه الشعور بالوحدة بين الناس دا اصبح احساس عام بيحس بيه معظم الناس ودا بيسموة فى علم الاجتماع ( الاغتراب )
على فكرة يا وينكى الاغنيه بجد عجبانى حاسسها اوى وحاسس انها هاتطلع منك تحفه بس
ماينفعش نغنيها سوا لو ينفع يعنى ؟
تحياتى
محمد فوزى .
السلام عليكم
لا بجد المرة دى حلوة اوى يا محمد
هو انا اللى فهمته يعنى انك بتتلكم عن الحب
صح والا انا اللى لسه مش مركزة
انا عشق كل حبيب انا حب لكنى غريب
دى اللى فهمتنى كدا
لو كان بئا قصدك عليك
وانك حاسس بوحدة وانت بين الناس
فانا بقولك بجد خلى نفسك صديقتك
وهى مش هتحسسك با اى وحدة
لحد ما ربنا يكرمك بحد يشاركها فيك
ال قولى انتى مقاطعنى والا ايه؟؟
رينا:
عليكم السلام ورحمه الله وبركاته
هو التصورين اللى قلتيهم لو جمعتيهم مع بعض هتلاقيهم واحد انا بتكلم عن ضياع الحب مش بينا وبين اللى بنحبه لاء دا كمان بين الناس كلها بين الناس وبعضها فى البيت فى الشارع فى الشغل بقى فيه اغتراب واحنا جوة بلدنا احساس بجد قاسى ومؤلم جدا اننا نكون بنكرة بعض او مش متوافقين السبب ايه دا راجع لاسباب كتيييييير يطول شرحها
والله يارينا انا مش مقاطعك ولا حاجه انا بعتذرلك على تقصيرى معاكى ومع كل الناس ودا بسبب الشغل والله اليومين دول ورمضانم قرب كل سنه وانتى طيبه والجو مكهرب ، انا بدخل مدونتى بالعافيه والله لكن انشاء الله قريب هاتزهقى منى ومن غلاستى عليكى فى مدونتك
ادعيلى
تحياتى
محمد فوزى .
مشكله والله يا محمد
فقدان الحب بينك وبين محبوبك وبينك وبين الناس
بيؤدي بالتبعيه للشعور بالوحده القاتله
يعني تبقي ماشي وسط الناس تعرفهم غريب وسطيهم
ضحكهم وكلامه غريب عليك
اصعب شيء الوحده بين الاهل
واقسي شيء ضياع الحب بين الناس
جامد ياا محمد
تسلم ايدك يا فندم والله
تحياتي
محدش حاسس بحد
:(
كلامك جه عالجرح ياميدو
بس قولي اخبارك ايه ليك وحشة
:)
gohayna:
ميرسى يا فندم على ذوقك الرفيع
دايما كدة فهمانى ورافعه روحى المعنويه
بجد الاحساس بالحب دا اكتر احساس بيدل على ان ربنا ميز الانسان ووضع فيه الاحاسيس والشماعر علشان يكرمه لكن احنا بنضيع الميزة دى بالعكس بالكرة والحقد ومايبقاش فاضل لنا غير الوحدة والغربه وحنا فى وسط ناسنا ووسط بلدنا
تحياتى ليكى
محمد فوزى
بسمه :
بسوووووم صباح الخير يا جميل
اخبارك ايه يارب تكونى بصحه وسعادة ، كلمه ميدو دى بجد وحشتنى جدا محدش قالهالى من فترة كبيرة جدااااا
انا الحمد لله تمام وزى الفل بوجودكم هنا جمبى وفرحان بزيارتكم لى دايما بجد انتو اكتر من مجرد اصحاب فعلا
كل اللى بيزورنى وبيسأل عنى بجد اصبحتو شىء مهم اووووووووى فى حياتى وربنا يديم الحب وعمرة مايضيع بينا ابدا ابدا
تحياتى ليكى
محمد فوزى .
ولا حد يمسح دمعه ولا يوم سألنى انا مين
تصور ان ده انا؟
وتصور ان الدمعه نزلت ومحدش حس بيها
ولا حتى كاتب الكلام حس
مش هقول اكتر من كده
:(
وحيد... مع انى بين الناس
وكأننا بنتلاقى... لكن بغير احساس
وحيد وبين ضلوعى كلام
ضايع فى وسط زحام
و ألام وراها ألام
ولا حد يسأل ليه .... تهرب كدة الاحلام !
بجد كلام جميل اوى وبيوصف حالتى جدا
بجد احييك على كلامك الرائع ده
حج ميدو ازيك مدام بتحبها بقي
ههههههههه
بس مينفعش حج
مع ميدو
عيالي اوي
نقول ميدو بس او معلم محمد
اختار ما بينالاقواس
انا جايه امسي يا باشا
ايه الاخبار حضرتك؟
شيماء الجيزى ::
انا قلت يا جميل انا مين اكون علشان ابكى عيون انسان ، انا مش بستحمل اشوف اى مخلوق حزين فمابالك بأنسان بيحس وليه مشاعرة ،
وبعدين ازاى انا مش حسيت ؟!!!!!!!!
انتى كدة بتسلبينى كل احساس وبتحطينى فى تصنيف الوحوش ، انا موش كدة والله
ولو يوم حسيت انى قسيت دا يمكن يكون احساس غلط مش اكتر
عموما انا مقدرش على زعلك و سماح يا اهل السماح :(
تحياتى ليكى
محمد فوزى .
شمعه امل :
اولا ميرسى جدا على زيارتك لمدونتى
تانى شىء انا بشكرك على رقتك وذوقك العالى
كلامى دا مش حالى لوحدى لاء دا فعلا حال شباب كتير حاسين بالوحدة بين احبابهم وسط اصحابهم
ويارب يسعدنا كلنا ويجعل ايامنا فرح
تحياتى ليكى
ومستنى زيارتك الجايه
محمد فوزى .
جهينه :
هههه بلاش الكلام اللى من تحت لتحت دا :(
وبعدين ميدو
وحاج ربنا يسمع منك بس عرفتى ان اسمى ميدو منين ؟ لازم فيه حد بيفتن
اصل الاسم دا ليه قصه معايا م ايام الكليه كانت ارق بنت فى الدفعه لازم كل يوم الصبح تقف فى اخر المدرج وتندة على وتقولى يا ميدوووووووووووووووووو
وانا يغمن على بعديها يفوقونى واروح اسلم دا لو رجلى شالتنى بعد كدة ،
اما موضوع عيالى دى عادى ياريت نرجع عيال تانى الواحد كان مستريح مع ان اخواتى البنات لسه بيعاملونى على انى طفل وعيل ولسه باخد العيديه فى العيد :(
اما عن حاله الطقس سورى اقصد عن احوالى
فأنا الحمد لله متظبططططط فى الشغل يعنى مطحون وماشى الحال
طمنينى انتى على اخبارك واحوالك ؟؟؟؟؟؟؟؟؟
وفينك وفين اراضيكى
يارب تكونى بخير
وتحياتى
محمد فوزى
الفرعون العاشق سابقا انسان جديد حاليا .
صباح شريف ونضيف
ازيك يا غالى؟
اخبار شغلك ومودك ايه؟ ربنا يعينك
موضوعك هايل لإن معظمنا ممكن يكون مر بالتجربة دي
خاصة اللى اتغربوا بره بلدهم
لإنها بتكون غربة برة وجوة ....
ساعات الانسان بيكون محاط بناس كتير لكن وجودهم زي عدمهم ، مجرد أطياف بشرية بتمر قدامك وتتكلم معاك
مفيش تواصل انسانى ولا روحى ولا فى مشاركة للمشاعر والأحاسيس
خالص مودتى يا ميدو
وينكى : هتغنيها ولن اتنازل
كلام لوجيك :
الف حمد الله على سلامتك يا غالى ، يارب تكون بخير .
انا تمام الحمد لله والشغل ماشى الحمد لله
الموضوع بجد عاجبنى انا شخصيا لانه مش مرتبط بى انا لوحدى لا بالعكس دا احساس عااااام بالاغتراب بداخل نفوسنا كلنا سواء موجودين جوة البلد ومع اهالينا واصحابنا او يكون اغتراب مضاعف لو احنا برة البلد ، ربنا معاك ويهون عليك غربتك وعلينا غربتنا ،
وينكى تغنى الاغنيه ماشى على عينى بس انا اشترطت اكون معاها ويبقى دويتو لازم انول الشرف الكبير دا
تحياتى يا صديقى
محمد فوزى .
انت فين يا حج؟
مختفي ليه كفا الله الشر
جهينه:
انا هنا هنا يابنت الحلال لا عايز جاة ولاكتر مال ، انا ولله الحمد موجود وعلى قيد الحياة ،
انا راجعلكو انشاء الله قريب اوى
المهم طمنينى انتى عليكى ؟
اخبارك والدنيا ماشيه ازاى معاكى؟ يارب تكونى بخير
تحياتى وشكرا على سؤالك
محمد فوزى .
ميرا المصريه:
انا قريتلك كتير يا محمد بس بحد دى عجبتنى قوى يا محمد قوى..وحسيتها زى اللى مقسومه لمقطعين جزء من الاول لحد قبل انا عشق كل حبيب والجزء التانى من بعده للاخر.
بس عجبتنى من الجزء التانى اكتر:
انا عشق كل حبيب انا حب لكنى غريب
من هنا للاخر تحفه يا محمد...
بس انا شايفه ان الحوار اللى قبل كده على قد ماهو وضح الصوره ومهدنا للجزء التانى .. على قد ما زود سواد النضاره السوده او النظره التشاؤميه اللى فى المضمون..وبعدها كتبت تحليلك لنفسك زى نسمه صغيره شقيه فى صحره القسوه اللى انت وصفتها او شمعه رقيقه وقويه فى ليل عليل زى ما قولت..برافو يا محمد انت خلقت جو من الخشونه والرقه فى زمن واحد انت ممتاز يا محمد ماشاء الله عليك..
تسمحلى اكتبلك حاجه:
وانا قلبى جواه النسمه
بس حتى النسمه محتاجه لبسمه
بسمه من على شفايف الضحكه
وجوه عنين الرحله
جوه عيونك انت
فتح عنيك وشوف
نور شمسك بينلى الحروف
حروف توصف الغربه
مرسومه جوه قلوب صعبه
قسوتها فى القشره
ولكن من جواها زهره
زهره عبيرها جميل
ورحيقها يسيل
وشهدها من حق اللى يقرى
ومتخدعهوش القشره
قشره الحزن والقسوه
مهما انت كانت الرسمه
سواء حزن او قسوه
طول ما الزهره نضره
مافيش مكان للوحده
ميرا :المصريه
يا مصريه يا ام عيون عسليه ، شرحتينى
وكأنك من دمى حته منى ، وكفايه كدة احسن اللى بالى بالك يزعلو مننا :(
عارفه ان معانيكى جامدة جدا بس لو زاد فيها حته الوزن شويه تبقى هايله
انتى جواكى احاسيس كتيييييييييير اوى نفسها تطلع ياريت تطلعيها ووريها لكل الناس ماتخبيهاش
بجد ميرسى جدا جدا لذوقك مرورك اللى بيسعدنى جدا ،
مع تحياتى محمد فوزى
Post a Comment