وصلنا لفين ؟

الموضوعيه ( التدوين والموضوعيه )

تعريف الموضوعيه بأسلوب سهل وبسيط هو قيام الانسان بتفهم كامل لحريته وامتلاكها ومن تفهمه لحريته هايقدر يحكم على اى شىء فى الدنيا بدون اى تحيز او بدون اى هدم بمعنى مثلا

ناخد مثال على التدوين : التدوين دلوقتى شىء جديد دخل حياتنا وخاصه لاصحاب المواهب اللى موش عارفين يظهروا مواهبهم للناس لاسباب كتير عدم اهتمام الناس بالمواهب دا غير صعوبه اظهار الموهبه سواء على المستوى الاعلامى او بينا وبين بعض كشباب ، طيب دلوقتى اصبح الوضع مختلف اصبح بعد انتشار الانترنت ببشاعه وسهوله تقصى الحقائق والمعلومات وسهوله عمل مدونات وفى ظل الحركه الجديدة دى حصل ايه

بدايه التدوين ونهايته؟

تعالو كدة نشوف ممكن يحصل ايه

عملنا ايه بالتدوين ؟

هل استخدمناة استخدام جيد ام استخدام سىء ؟

هل قلنا اللى جوانا بجد ولا تعليقاتنا كانت من باب المجامله علشان اللى انا داخل اسيب عندة تعليق يدخل ويسيبلى تعليقه , وطبعا مستنى تعليق حلو يشرح القلب ومايعارضنيش فى اى كلمه قلتها ولو كانت مالهاش اى لازمه ؟

اتكلمنا بموضوعيه بجد ؟ ولا خفنا من بعض موش لازم من حد يعنى ؟

هل كل المدونات هادفه ولا نصها هادف ونصها هايف ؟

مين أثر فينا بكتاباته ومين جاملناة ؟

اسئله كتير شاغله بالى

ممممممم اة عذرا لانى موش مرتب افكارى انا بتلقى كل الافكار اللى بتمليها على دماغى حاليا

فيه ناس بجد عملت مدونات بتتكلم فى اى حاجه وفى كل حاجه ومش عارفه هى عملتها ليه ، وماله بس ليه مانخليش لينا هدف ! ناس كتير ما سألتش نفسها انا قررت اعمل مدونه ليه ؟.

طيب بموضوعيه شديدة انا شفت ناس بتكتب حلو جدا جدا جدا لكنها بتتجه اتجاهات غريبه وحصرت نفسها داخل اتجاة معين وبجد صعبان على موهبتهم جدا ا لانهم بيتجهو اتجاة مش تمام مش قاصد اتجاة سياسى او دينى يكون سىء لاء بالعكس

اتجاة حياتى اوى دنيوى اكتر من اللازم يعنى خلى ليك ميل واتجاة بس مش داخل تشتم فى حد تانى وخلاص بمعنى : مثلا ست مش طايقه جوزها داخله تشتم الرجاله وصباح التصفيق الحار والله عليكى ياست وكسبتى بالضربه القاضيه او راجل يشتم الستات او واحد عامل مدونه مقرفه على حد تعبيرة هو شخصيا برغم ان كتابته حلوة وفكرة جميل الا انه عامل مدونه حبا فى القرف ، وواحد بكتب وفرحان انه بيكتب وهو عامل دماغ ولو حد عارضه يبقى ضيع الدماغ ، وناس داخله وظيفتها التصفيق الحار لا ليها رأى ولا اى حاجه بيهتف للهتاف فقط
وواحد ساب التدوين خالص وزهق من الناس ، وناس تقول مدونه نضيفه ومدونه غير نضيفه ، وتاجات رايحه جايه بالهبل لناس من ناس مجامله تحس ان انت قاعد فى فرح شعبى وواحد بيمسى عليك بحجر معسل ولازم تشربه ، وبنات و شباب فاضيه من جوة .

المحصله: دلوقتى بجد فلترنا المدونات وعرفنا مين هايعيش ونفتكرة ومين مش هانعتب باب بيته او مدونته، ناس هاتقولى انت مين علشان تصنف المدونات اقول انا من حقى لانه رأيى وانا حر زى ما انت حر تدخل او ماتدخلش عند اى حد .

بجد يا شباب كلنا هربنا للمدونات علشان نتناقش ونتكلم ونتفاهم ونتخاصم ونتصالح ونختلف فى الرأى بس لما يكون فيه رأى، عاوزين نخرج من اللى بنشوفه برة ياريت نبعد عن التزييف وعن التصفيق وعن الطبطبه علشان تعيش المدونات وتكبر ونكبر معاها بعقولنا وبفكرنا عاوزين نتكلم فى موضوعات مهمه نهزر نضحك نفضفض بس يكون عندنا فكر ثقافه نعلم بعض نتجمع ونتقابل ونعمل حفلات
ايه المانع ، عاوزين ان المدونات تكون مكان محايد لا فيه اتجاهات ولا اغراض غير غرض واحد حبنا للعلم للمعرفه للفضفضه
وحبنا كشباب لبعض نفيد بعض ونفيد اللى هايقرأ ، وتحياتى لكل انسان بيكتب موضوعات تفيد وتهم كل انسان، تحياتى لكل انسان وانسانه فكر وتعب وكتب موضوعات بجد اضافتلنا شىء ، بجد انا بتعلم من ناس كتير على المدونات
افكارهم حلوة وارأهم جميله ويارب يارب من احسن لاحسن .

محمد فوزى