إحنا بتوع الاتـــــــوبيــــس

إحنا بتوع الاتوبيس


أتوبيس حياتنا مليان

من كتر حِملة زهقان وتعبان

مايل بجنب

ماشى بيعرج

وكأنة أنسان من زمان

هدة الزمان ودوبة

من كتر لفة فى الشوارع والميادين والحارات

شايل فى حضنة ناس كتيييرة

برضة زية تعبانين.. شقيانين فى المدينة

هو بيصرخ منهم.... من حملهم

وهما واقفين ينفخوا ... من زنقتة

ودوشتة وطول طابورة

لاهما طايقينة ولا.. ولا هو طايق

واقف حرامى مهمتة ..

الاحتفاظ بالمحافِظ والبطايق

حتى لو إحنا مفتحين

من الحر كل الناس تزمجر ولا حد طايق

زيتنا فى دقيقنا جوة اتوبيسنا العزيز

سلوتنا تزنيقة وبصة ... سبحانه البديع

دى بنت إية اللى زنقها ... يكونش دا هو مزاجها

دى كلمه قالها صاحبى عبد البديع

يا نهار بديع !!!!!!!!

واللى مطاقش الزنقة ... يجرى ينط يفط

ياخدلة تاكسى ولا ميكرو ولا مترو ينط

عرجان زى اتوبيسنا العزيز

ومش لذيذ

لانة فاصلين الحريم عن الرجال

دى جبة وقفطان ودى بدلة وبجامة ترجال

وهى هى زنقتة مفهاش فصال

واللى يحب يهج يكون من الرجال

ياخدلة مركب ترمية بقسوة وسط البحور

مش فارقة مات ولا غرقان .. سيبة يغور

ولما ترجع جتتة يقولو شوف

مرضيش بعيشتة الحزين

عليك وعلى كل اللى جابك

يلعن ويحرق سلافين جدودك واللى جابك

مرضيش بأتوبيسنا العزيز

أبو زحمة تسعد الحزين

ابو عرجة مرجيحة وبابين

تحب تنزل يقلبك قبل ماتنزل

لا تقول فى سِيرك تقوم وتعمل شقلباظ

لا تقولى توكتوك ولا حتى ميكروباااااظ

واحنا بتوع الاتوبيس

ابو عرجة تشرح قلب كل عانس او عريس

تحياتى : من جوة الاتوبيس

صعـــــــب

صعب

صعب يموت الحب سنين

ويرجع تانى بشوق وحنين

صعب يعود بالساهل حبك

إتعودت اغيب عن حضنك

إتعودت أعيش ويايا

وانسى مشاعرى وحتى هوايا

يا ما قاسيت فى جراح جوايا

واتعذبت وكنت وحيد

عن حبك خلينى بعيد

صعب على أكون الحل

لما تقاسى واكون بالسهل

دوقى لمرة الخوف والذل

زى مادوقتينى سنين

صعب يموت الحب سنين

ويرجع تانى بشوق وحنين

محمد فوزى

هــى فوضــــــــــــى!!!!!؟

هى فوضى

قلب نفسك يا خفيف
النبى حارسك وضامنك يا طعم يانايتى يا سيد أمك
يمكن بمناسبة مهرجان السينما الحادى والثلاثون المصرى
الواضح ان الشرطة متابعة سينيما كويس جدا واقتبست العبارة دى من مشهد فى فيلم لاحمد حلمى النجم الموهوب
فى فيلم زكى شان

بس هما للأسف تقمصو دور الناس اللى كانت بتقلب احمد حلمى بكل تبجح وبكل إستهانة بالناس اللى موجودة


حدث بالفعل :

مشهد : ليل داخلى خارجى كرهتة وكرهت اليوم اللى خرجت فية اصلا

اقرب مكان لينا كان احد الكافيهات متوسطة الحال ملحوظة ( بداخل احد المولات المقام بجوار احد الجامعات )

عادى جدا جلسنا نتهبب نشرب اى حاجة ونتكلم فى مشكلة معينة

وإذ بنا نفاجىء خير اللهم أجعلة خير مجموعة رجال ماشاء الله رجالة الواحد منهم يسد عين الشمس داخلين بشكل درامى جدا طايحين فى الناس اللى موجودة وبطايق وحركات وأسلوب غليظ جدا ..... بطايييييييييق إية إحنا فين هنا إحنا فى كمين ولا اية ؟ دا واحد اتفزلك وقالها وياريتة ما قالها ( فى الطرابيزة المجاورة ) وهاتك يا إهانة والذى منة وبطاقتك يا عم الخفيف يا ابو الرجالة يا طعم يا نايتى يا سيد أمك وانتى يا حلوة بطاقتك ( الكلام موجة للأنسة اللى معاة ) طبعا صاحبكو اللى هو انا شفت المنظر ودانى احمرت واتخضيت وقولت يا ليلة مهببة يعنى انا على الدور ولا اية وهاتقلب برضو واتفتش ذاتى كدة ؟ نسيت اقول إن الشاب الطعم النايتى كما قال علية رجال الأمن اتفتش ذاتيا عقابا لية على لماضتة ولولا رحمة قلوبهم لفتشو الانسة اللى معاة ذاتيا الحقيقة ناس ذوق ذوق ذوق الصراحة وماعملوش كدة لانهم كانو لسة مصليين العشاء ولسة على وضوئهم فمحبوش ينقضو الوضوء لا أكثر ولا أقل .

طبعا ترابيزتنا اللى عليها الدور بقى استعديت أنا وكلام فى سركو قررت انى ما انضربش على قفايا وقلت اتكلم بكل ذوق واطلع كارت من اللى شايلهم للزنقة بس فكرت إنى برضو هانضرب على قفايا لا محيص اذا جربت واتجرأت وعملت زى الاخ صاحب النخوة بس برضو قررت انى لو عشت لازم اعيش راجل مش علشان اللى معايا ومنظرى قدامهم لاء علشان حاجة تانية ( علشان تعب ابويا وسهر أمى سنين كانو بيموتو علشان اتعلم والعلم دا يعنى نور زى ما طول عمرنا بنسمع والنور يعنى الإحساس والكرامه والشعور بالذات وأنك تحس أقل احساس انك انسان إنك بنى أدمممممممممم ولو الاحساس دا راح واتهنت يبقى يا ريتكو ماخلفتونا أموت احسن ولا إنى اتهان وانا مش لى ذنب وماشى بما يرضى الله )

الحمد لله ربنا سترها بالنسبة لى محدش قربلى دا من رحمة ربنا اشمعنى بقى الله اعلم ربنا عماهم عنى ( شوف الخوف )
برغم ان الواحد سليم وقاعد بكل احترام لكن بجد الناس دى ربتلنا الخفيف .

اتعلمنا نخاف :

طيب يابنى انت كويس وماشى تمام ومش شايل مايغضب الله او رجال الامن من محظورات طيب خايف لية ؟

مش عارف اتعلمنا كدة نخاف وزى ماهما عملو ونجحو فية اضرب المربوط يخاف السايب بقى كلة يخاف بغض النظر انة فعلا تمام وماشى سليم !!!!!!!

تساؤل :

هو خلاص الدنيا تمام والامن استتب لدرجة ان الامن من كتر ماهو شايف شغلة بقى يدخل اى مكان حتى لو كان كافية او بمعنى أصح مكان عام .
هل فعلا ليهم الحق فى التفتيش كدة بدون بلاغ والله انا عن نفسى مش ممانع عن التفتيش ولو كان ذاتى اية يعنى طالما فى المصلحة بس ..........
اة بس بشرط يكون بشكل أدمى شوية هو اة مش هايطبطبو على الواحد ويبوسوة بوسة سيما علشان يطمن او هاياخدوة فى حضنهم ويقولولو والله مش هاتحس بحاجة دا تفتيش زى شكة الدبوس لكن يكون بأقل مبدأ من مبادىء الاحترام الأدمى

يا جماعة انا لا اعترض على عمل الامن ابداااااااااااااا وربنا يكون فى عونهم ولكن مش كل الناس سوابق ومش كل البنات عاهرات ومش كل شاب يبقى مش تمام ومش كل ملتحى إرهابى كلنا فى الاول والاخر هانقف بلابيص قدام ربنا نتحاسب فياريت نحاسب نفسنا قبل مانتحاسب وان كنتو اخوات اتحاسبو واتعاتبو وانا بعاتب مش بحاسب علشان انا بحب بلدى اوى وعاوزها احلى بلد فى الدنيا ، فية فوضى فى كل مكان وكل بلد بس العنف مش بيولد الا العنف .

سؤال تانى والنبى :

تجار الكيف معروفين والاحياء الشعبية مليانة طيب متسابين لية ؟!!! دا تساؤل

اماكن العرى وقلة الادب مالية الدنيا ومعروفة ؟؟؟؟؟؟؟؟ متسابة لية

تجمعات الشباب والبنات والذى منة ( كل اللى فى بالكو ) معروفة اوى بقى دى وعلى عينك يا تاجر ؟؟؟؟؟؟ مش بيتعمل معاهم حاجة لية لية ؟..

لية الخوف كدة بقى مالينا ؟ !!!!


ربنا يجازيك يا حاج مدخلتنيش لية شرطة دفعتى دلوقتى كلها نقباء ومتشكر جدا

قعد يقولى لاء لاء انت ولد وحيد أخاف تتبهدل ... أل دلوقتى مش هايخاف لاء خاف اوى بقى خاف خاف وبراحتك اوى يا مان .

ملاحظة :
على فكرة القصة دى خيالية تماما ولست مسؤولا عن تطابق روايتى على أى شخصية حقيقية وماليش دعوة اصلا بأى حاجة محدش ضامن ظروفة

الجنـــــــة باب مفتــــــوح

الجنة ... باب مفتوح

مش عارف أبكى ولا أشكى ولا ابوح ولا انوح

نفسى أصرخ وألقى نفسى قلبى خالى من الجروح

نفسى شمسى تطل مرة وتبكى نور يكوى الجروح

عايش حقيقى ولا .. زيى زى طير وحيد مدبوح

جنحاتة والله ماساعدتوش يهرب يكون حر وصبوح

يارب إنت كل اللى لينا بيك حياتنا

نحياها بيك وليك نروح

قوينا يارب فى طريقنا وكون معانا

قربنا منك وأرضى عنا

علشان تعود الابتسامة

واجعل عشنا الجنة باب مفتوح

محمد فوزى

جدوى الحــــــياة

جدوى الحــــــياة

ما جدوي الحياة بدون سلم او دماء؟

وما جدوي حياة نعيشها من دون كبر أو غباء؟

وما جدوي أن تعيش عاشقا ... في زمن الغواني والبغاء

لا أري سوي الضجيج والصراخ والعواء

الكل يشكي للنقيض نقيضه

متمنيين أن نعيش حياتنا كل سواء

لا فرق بين الاخذ والعطاء

لكن للحظات اكتشف حقيقه

أن البغاء جاء رساله مفادها معني الحياء

والضد جاء حاملا في نبضه معني السواء

والدين جاء لغايه مفادها ( عدل السماء)

لم يفهم الحكمه يوما الا قليل هم حكماء

مسكين انت يا قارئي فانا وانت علي السواء

قرات مني قصيدتي وخرجت منها بالخواء

اتظن ان قصيدتي كانت غباء

لكن أقرواعترف ان الغباء

أن الغباء مفادهُ

أن أفهم الدنيا التى

تعيشها كل النساء

محمد فوزى

سلام يا صاحبى

غدر الاصحاب



موضوع قديم جدا قدم وجود البشر على الارض الغدر لكن بجد محدش يحس بيه اللى عايش فيه
غدر الاخ بأخوة وغدر الصاحب لصاحبه هل الغدر صفه اساسيه موجودة جوة الانسان ؟
طيب لو الغدر صفه اساسيه يبقى الوفاء ايه؟ صفه غير اساسيه يعنى صفه عرضيه ؟
طيب وليه دايما الغدر باين اوى ؟ وليه دايما هو المسيطر والمحرك الاول لافعالنا ؟
يمكن الزمن اتغير ؟ بالتالى شكل الصداقه اتغير شكلا وموضوعا !!!!!!!

الزمن الغريب ؟

يمكن الاقى الراحه فى بعدى عن الاصحاب .....

اولا الحياة مابتقفش على حد دا مبدأ لا هاتقف على ولا عليك ولا عليكى لا فى الحياة الاجتماعيه ولا العاطفيه ولا فى اى مجال ، دى النتيجه اللى وصلتلها


طعنه فى قلب الوفاء :


قال الامام الشافعى

إني صحبت الناس ما لهـم عـدد--- وكنت أحسب إني قد مـلأت يـدي

لمـا بلـوت أخلائـي وجدتهـم---- كالدهر في الغدر لم يبقوا على أحد

وقال على بن ابى طالب رضى الله عنه

تغيرت المودة و الاخـــــــــــــاء وقل الصدق وانقطع الرجاء

واسلمني الزمان الى صديق كثير الغدر ليس له رعــاء

ورب اخ وفيت له بحــــــــــــــق ولكن لا يدوم لــــــه وفـــاء






حسبنا الله ونعم الوكيل .

البوحيه

والنبى بوحه


احييك بتحيه البوحيه : صبح صبح يا عم الحاج


دين جديد ظهر او بمعنى ادق خرافه جديدة من تخاريف الناس بسبب انتشار المخدرات ولا ايه لا احد يعلم السبب
بدأ الخبر بأحد الجرائد بذهاب رجل من سكان مدينه الاسكندريه الى السجل المدنى يستخرج بطاقه شخصيه وكتب بداخل خانه الديانه بوحى J طبعا مما اثار ضحك الموظفين جميعا مما اثار غضبه واصرارة على كتابه الدين البوحى بالخانه حيث قال أن الديانة البوحية ترجع بداياتها إلى القرن الرابع الميلادي وهي منشقة عن الطائفة المارونية وتعود شهرتها إلى مارون الذي أقام ديراُ على جبل لبنان وأصبح له أتباع هم الموارنه ثم ظهر يوسف شميس البوحي ليؤسس لهذه الديانة البوحية التي يعتقد أنه نبي وهو الأب الروحي وهو أيضا ، بحسب مزاعمهم ، النور والحياة والهواء وذكر ايضا ان من تعاليم البوحية ،حسب ما ورد في تصريحات الرجل ، أن أتباع هذه الديانة يتزوجون كما يحلو لهم بدون أوراق أو مستندات رسمية ويحرمون اللواط لكنهم يبيحون السحاق !!!! ويتخذون من لبنان قبلة لهم على غرار الكعبة عندنا يعنى لأنهم يعتقدون أن نبيهم توفي ودفن هناك فى جنوب لبنا ن شكلو كان رايح يصيف هناك .
وبعدين يا جماعه هو ايه اى حد يطلع يقول انا نبى وانا معصوم وواحد يقول انا بهائى وانا بوحى وتعدى كدة وشكرا وخلاص هو فيه ايه الناس اتهطلت ولا ايه ، بكرن نصحى من النوم نلاقى الدين الكركرى نسبه الى كركر " ايوة .....ايوة حاضر حاضر حاضر" والدين الكتكوتى " لصاحبه كتكوت ابو الليل بررررررم بررررم تيرارا رارا
كل من هب ودب تطق فى دماغه يخترع دين ويحط له اساسيات لان دينه السماوى مش على هواة او بيطمح فى الشهرة بس على مين هايتظبط دنيا واخرة هو للدرجه دى معادش فيه فهم
فَاعْبُدُوا مَا شِئْتُم مِّن دُونِهِ قُلْ إِنَّ الْخَاسِرِينَ الَّذِينَ خَسِرُوا أَنفُسَهُمْ وَأَهْلِيهِمْ يَوْمَ الْقِيَامَةِ أَلَا ذَلِكَ هُوَ الْخُسْرَانُ الْمُبِينُ سورة الزمر أيه رقم ( 15 )

قُلْ أَغَيْرَ اللّهِ أَتَّخِذُ وَلِيًّا فَاطِرِ السَّمَاوَاتِ وَالأَرْضِ وَهُوَ يُطْعِمُ وَلاَ يُطْعَمُ قُلْ إِنِّيَ أُمِرْتُ أَنْ أَكُونَ أَوَّلَ مَنْ أَسْلَمَ وَلاَ تَكُونَنَّ مِنَ الْمُشْرِكَينَ (آية 14) من سورة الانعام
قَالَتْ رُسُلُهُمْ أَفِي اللّهِ شَكٌّ فَاطِرِ السَّمَاوَاتِ وَالأَرْضِ يَدْعُوكُمْ لِيَغْفِرَ لَكُم مِّن ذُنُوبِكُمْ وَيُؤَخِّرَكُمْ إِلَى أَجَلٍ مُّسَـمًّى قَالُواْ إِنْ أَنتُمْ إِلاَّ بَشَرٌ مِّثْلُنَا تُرِيدُونَ أَن تَصُدُّونَا عَمَّا كَانَ يَعْبُدُ آبَآؤُنَا فَأْتُونَا بِسُلْطَانٍ مُّبِينٍ " سورة ابراهيم ايه رقم: ( 10 )


وانشاء الله المرة الجايه ربنا يعينا علشان نجيب الادله العقليه على وجود الله للى دماغه مش فيه


وَاتَّبِعُوا أَحْسَنَ مَا أُنزِلَ إِلَيْكُم مِّن رَّبِّكُم مِّن قَبْلِ أَن يَأْتِيَكُمُ العَذَابُ بَغْتَةً وَأَنتُمْ لَا تَشْعُرُونَ


وربنا يهدى العاصى